దేశవ్యాప్తంగా 326 మంది సిట్టింగ్ ఎంపీలు, 14 రాష్ట్రాల ముఖ్యమంత్రులు క్రిమినల్ కేసులను ఎదుర్కొంటున్నారని అమికస్ క్యూరీ నివేదిక పేర్కొంది. ప్రస్తుతం మాజీ, ప్రస్తుత ఎంపీలు, ఎమ్మెల్యేలపై మొత్తం 4,192 కేసులు పెండింగ్లో ఉన్నాయి. లోక్సభలో 170 మంది, రాజ్యసభలో 40 మంది ఎంపీలపై ఐదేళ్లు లేదా అంతకంటే ఎక్కువ శిక్ష పడే అవకాశం ఉన్న తీవ్రమైన క్రిమినల్ కేసులు ఉన్నాయి.
రాష్ట్రాల వారీగా చూస్తే, తెలంగాణ ముఖ్యమంత్రి రేవంత్ రెడ్డిపై అత్యధికంగా 89 కేసులు నమోదయ్యాయి. ఆ తర్వాత పశ్చిమబెంగాల్ ముఖ్యమంత్రి సువేందు అధికారిపై 29, కర్ణాటక ముఖ్యమంత్రి డీకే శివకుమార్పై 19 కేసులు ఉన్నాయని నివేదిక తెలిపింది. కేరళలోని 20 మంది ఎంపీల్లో 19 మందిపై క్రిమినల్ ఆరోపణలు ఉండగా, ఒడిశా, తమిళనాడు, ఝార్ఖండ్ రాష్ట్రాల్లో కూడా అధిక సంఖ్యలో ఎంపీలు కేసులు ఎదుర్కొంటున్నారు.
సుప్రీంకోర్టు, హైకోర్టుల పర్యవేక్షణలో విచారణ జరుగుతున్నప్పటికీ, 2018 నుంచి పెండింగ్ కేసుల సంఖ్యలో పెద్దగా మార్పు లేదు. 2025లో 1,243 కేసుల విచారణ పూర్తయినప్పటికీ, అదే సమయంలో 1,050 కొత్త కేసులు నమోదయ్యాయి. అలహాబాద్ హైకోర్టు నుంచి సమాచారం అందకపోవడంతో ఉత్తరప్రదేశ్ రాష్ట్ర వివరాలను ఈ విశ్లేషణలో చేర్చలేదు.
