మహిళల్లో హార్మోన్ల అసమతుల్యత, జీవక్రియ లోపాలు గతంతో పోలిస్తే చాలా చిన్న వయసులోనే బయటపడుతున్నాయి. ఒకప్పుడు 30 ఏళ్ల తర్వాత కనిపించే ఈ సమస్యలు, ఇప్పుడు టీనేజ్ బాలికలు, కళాశాల విద్యార్థినుల్లో కూడా పెరుగుతున్నాయని నిపుణులు చెబుతున్నారు. నెలసరి సక్రమంగా రాకపోవడం, కారణం లేకుండా బరువు పెరగడం, మొటిమలు, అవాంఛిత రోమాలు, నిరంతర అలసట వంటి లక్షణాలు ఈ జీవక్రియ లోపాలకు సంకేతాలని వారు పేర్కొంటున్నారు.
బాలికల్లో యుక్తవయస్సు ముందుగానే ప్రారంభం కావడం ఈ పరిస్థితికి ఒక ప్రధాన కారణం. దీనికి తోడు అధిక స్క్రీన్ టైమ్, శారీరక శ్రమ లేకపోవడం, ప్రాసెస్డ్ ఫుడ్స్ తీసుకోవడం వంటి అలవాట్లు హార్మోన్ల వ్యవస్థపై ఒత్తిడిని పెంచుతున్నాయి. ఫలితంగా పాలీఎండోక్రైన్ మెటబాలిక్ ఓవేరియన్ సిండ్రోమ్ (PMOS), థైరాయిడ్, ఇన్సులిన్ రెసిస్టెన్స్ వంటి సమస్యలు చిన్న వయసులోనే తలెత్తుతున్నాయి. PMOSను కేవలం పునరుత్పత్తి వ్యవస్థ సమస్యగా చూడకుండా, శరీర జీవక్రియ, ఇన్ఫ్లమేషన్, బరువు నియంత్రణ వంటి అంశాలతో ముడిపడి ఉన్న సమస్యగా గుర్తించి చికిత్స అందించాలని నిపుణులు సూచిస్తున్నారు.
ఇన్సులిన్ రెసిస్టెన్స్ సమస్య ఇప్పుడు టీనేజర్లలో కూడా కనిపిస్తోంది. శరీరం ఇన్సులిన్కు స్పందించనప్పుడు ప్యాంక్రియాస్ అధికంగా ఇన్సులిన్ను విడుదల చేస్తుంది, ఇది ఆండ్రోజెన్ హార్మోన్ల స్థాయిని పెంచి ఓవ్యులేషన్ ప్రక్రియను దెబ్బతీస్తుంది. రాత్రివేళ తగినంత నిద్ర లేకపోవడం, పడుకునే ముందు మొబైల్ ఫోన్ వాడటం వల్ల బ్లూ లైట్కు గురై హార్మోన్ల పనితీరు దెబ్బతింటోంది. చదువు, ఉద్యోగ పోటీ, సోషల్ మీడియా ప్రభావంతో పెరిగిన నిరంతర మానసిక ఒత్తిడి వల్ల కార్టిసోల్ హార్మోన్ పెరిగి, ఈస్ట్రోజెన్, ప్రొజెస్టెరాన్, థైరాయిడ్ పనితీరుపై ప్రతికూల ప్రభావం చూపుతోంది.
శరీరం నుంచి వచ్చే ఈ ముందస్తు హెచ్చరికలను నిర్లక్ష్యం చేయకూడదని నిపుణులు హెచ్చరిస్తున్నారు. అనారోగ్యం తీవ్రం కాకముందే సమతుల్య పోషకాహారం, క్రమం తప్పకుండా వ్యాయామం, ఒత్తిడి నియంత్రణ, తగినంత నిద్ర వంటి ఆరోగ్యకరమైన అలవాట్లను చిన్న వయసు నుంచే అలవర్చుకోవాలి. జీవనశైలి, హార్మోన్ల ఆరోగ్యం, సంతానోత్పత్తి ఒకదానితో ఒకటి ముడిపడి ఉన్నాయని గుర్తించి మార్పులు చేసుకోవడం ద్వారా భవిష్యత్తులో వచ్చే అనేక సమస్యలను నివారించవచ్చని వారు సూచిస్తున్నారు.
