డాక్టర్ పి కుమార్ తమ దుస్తులు, వ్యక్తిగత విషయాలపై అసభ్యకరమైన వ్యాఖ్యలు చేస్తున్నారని ఆశా కార్యకర్తలు ఫిర్యాదులో పేర్కొన్నారు. భర్తలు తమను పని ప్రదేశానికి ఎందుకు దింపుతున్నారని ఆయన ప్రశ్నిస్తున్నారని, తాము ధరించే చీరలు, జాకెట్లపై కూడా అనుచితంగా మాట్లాడుతున్నారని వారు ఆరోపించారు.
విధుల నిర్వహణలో భాగంగా డాక్టర్ తమపై అనవసరమైన ఆంక్షలు విధిస్తున్నారని మహిళలు తెలిపారు. ఒక కార్యకర్త మామగారు చనిపోయినా సెలవు ఇవ్వలేదని, కనీసం శౌచాలయానికి వెళ్లినా రిజిస్టర్ బుక్లో నమోదు చేయాలని ఆదేశిస్తున్నారని వారు పేర్కొన్నారు. ఈ ప్రవర్తన వల్ల తాము తీవ్ర మానసిక వేధింపులకు గురవుతున్నామని వారు ఆవేదన వ్యక్తం చేశారు.
గతంలో అడ్డగూడూరులో పనిచేసినప్పుడు కూడా డాక్టర్ ప్రవీణ్ కుమార్ ఇలాంటి ఆరోపణలే ఎదుర్కొన్నారని సమాచారం. అక్కడ ఒక మహిళా ఉద్యోగినిని లైంగికంగా వేధించారనే ఫిర్యాదుల నేపథ్యంలోనే, జిల్లా అధికారులు ఆయనను డిప్యుటేషన్పై (తాత్కాలిక బదిలీ) గుండలకు పంపారని ఆరోపణలు ఉన్నాయి.
తక్కువ జీతంతో పనిచేస్తున్నా ప్రజలకు సేవలు అందిస్తున్న తమపై, డాక్టర్ వ్యవహరిస్తున్న తీరుపై చర్యలు తీసుకోవాలని కార్యకర్తలు కోరుతున్నారు. ఈ ఫిర్యాదులపై ఉన్నతాధికారులు ఎలా స్పందిస్తారనేది వేచి చూడాలి.
