తిరుమలలోని సుమారు 162 ఫాస్ట్ఫుడ్ సెంటర్లు, హోటళ్లు, 7 జనతా కాంటీన్లు, 5 పెద్ద కాంటీన్లలో ఇకపై గోబీ రైస్, గోబీ 65, గోబీ మంచూరియా వంటి వంటకాలు దొరకవు. క్యాలీఫ్లవర్లో పురుగులు ఉన్నట్లు ఫుడ్ సేఫ్టీ అధికారులు (ఆహార భద్రతను పర్యవేక్షించే అధికారులు) తనిఖీల్లో గుర్తించడంతో టీటీడీ ఆరోగ్య విభాగం ఈ ఆంక్షలు విధించింది.
ఈ నిర్ణయం అమలుకు సంబంధించి వారం రోజుల క్రితమే టీటీడీ హెల్త్ డిప్యూటీ ఈవో సోమనారాయణ హోటల్ నిర్వాహకులతో సమావేశమయ్యారు. ఈ సీజన్లో క్యాలీఫ్లవర్లో పురుగులు ఉండే అవకాశం ఎక్కువగా ఉందని, సరిగ్గా శుభ్రం చేయకుండా వండితే భక్తులకు ఆరోగ్య సమస్యలు వస్తాయని ఆయన హెచ్చరించారు. భక్తుల నుంచి వస్తున్న ఫిర్యాదులను పరిగణనలోకి తీసుకుని, వారి ఆరోగ్య భద్రతకే ప్రాధాన్యమిస్తూ ఈ వంటకాలను ఆపేయాలని సూచించారు.
ప్రస్తుతం హోటల్ నిర్వాహకులు ఆరోగ్య శాఖ సూచనలను పాటించేందుకు సిద్ధమయ్యారు. దీంతో తిరుమల కొండపై గోబీ వంటకాలకు ఇక తెరపడినట్లేనని తెలుస్తోంది. అయితే, తిరుపతి నుంచి వచ్చే కూరగాయల్లో క్యాలీఫ్లవర్ కలవకుండా చూడాల్సిన బాధ్యత టీటీడీ విజిలెన్స్ (నిఘా) విభాగంపై పడనుంది.
మరోవైపు, రోజుకు రెండు లక్షల మందికి పైగా భక్తులు భోజనం చేసే తరిగొండ వెంగమాంబ నిత్య అన్నదాన కేంద్రంలో క్యాలీఫ్లవర్ వినియోగంపై ఇంకా స్పష్టత రాలేదు. దాతల నుంచి రోజుకు సుమారు 20 టన్నుల కూరగాయలు ఉచితంగా అందుతుండగా, అందులో అప్పుడప్పుడు క్యాలీఫ్లవర్ కూడా వస్తోంది. అన్నదాన విభాగం కూడా ఈ నిషేధాన్ని అమలు చేయాలా వద్దా అనే దానిపై త్వరలో అధికారిక నిర్ణయం తీసుకునే అవకాశం ఉంది.
ఒకవేళ అన్నదానంలో కూడా క్యాలీఫ్లవర్ను పూర్తిగా నిషేధిస్తే, దాతల నుంచి కూడా ఆ కూరగాయను స్వీకరించకుండా టీటీడీ చర్యలు తీసుకుంటుంది. భక్తుల ఆరోగ్య భద్రత దృష్ట్యా క్యాలీఫ్లవర్ తిరుమల కొండకే చేరకుండా నిరోధించే అంశంపై టీటీడీ తుది నిర్ణయం కోసం వేచి చూస్తున్నారు.
