టర్కీకి అత్యాధునిక F-35 యుద్ధ విమానాలను విక్రయించవద్దని ఇజ్రాయెల్ ప్రధాని బెంజమిన్ నెతన్యాహు చేసిన అభ్యర్థనను అమెరికా అధ్యక్షుడు డొనాల్డ్ ట్రంప్ తిరస్కరించారు. ఎయిర్ ఫోర్స్ వన్లో మీడియాతో మాట్లాడిన ట్రంప్, అమెరికా ఏ దేశానికి ఆయుధాలు విక్రయించాలో ఇతరులు చెప్పాల్సిన అవసరం లేదని స్పష్టం చేశారు. టర్కీని బలమైన సైనిక సామర్థ్యం కలిగిన గొప్ప మిత్రదేశంగా ఆయన అభివర్ణించారు.
వాషింగ్టన్ పర్యటనలో ఉన్న నెతన్యాహు, సీఎన్ఎన్తో మాట్లాడుతూ ఈ విక్రయంపై తన అభ్యంతరాలను వ్యక్తం చేశారు. టర్కీ అధ్యక్షుడు రెసెప్ తయ్యిప్ ఎర్డోగాన్ ఇజ్రాయెల్ను నాశనం చేస్తానని బెదిరిస్తున్నారని, అలాంటి దేశానికి ప్రపంచంలోనే అత్యుత్తమమైన F-35 విమానాలను ఇవ్వడం సరైంది కాదని ఆయన వాదించారు. టర్కీ ప్రభుత్వం ముస్లిం బ్రదర్హుడ్ ప్రభావంతో అమెరికా వ్యతిరేక భావజాలాన్ని ప్రోత్సహిస్తోందని, ఈ విక్రయం మధ్యప్రాచ్యంలో శక్తి సమతుల్యతను దెబ్బతీస్తుందని నెతన్యాహు హెచ్చరించారు.
మరోవైపు, రష్యా నుంచి S-400 వైమానిక రక్షణ వ్యవస్థను కొనుగోలు చేసినందుకు టర్కీపై గతంలో విధించిన ఆంక్షలను ఎత్తివేసే అంశాన్ని ట్రంప్ ప్రభుత్వం పరిశీలిస్తోంది. టర్కీకి F-35 విమానాలను విక్రయించే ప్రతిపాదనను తప్పకుండా పరిశీలిస్తామని ట్రంప్ వెల్లడించారు.
అమెరికాతో F-35 యుద్ధ విమానాల కొనుగోలు ఒప్పందం తుది దశకు చేరుకుందని టర్కీ అధ్యక్షుడు ఎర్డోగాన్ ఇటీవల పేర్కొన్నారు. అంతేకాకుండా, టర్కీ తన స్వదేశీ KAAN యుద్ధ విమాన ప్రాజెక్టు కోసం అమెరికా తయారీ ఇంజిన్లను పొందేందుకు కూడా ప్రయత్నిస్తున్నట్లు సమాచారం.
