టాలీవుడ్ హీరోలు వరుసగా గాయాల బారిన పడుతున్నారు. తాజాగా 'డ్రాగన్' సినిమా షూటింగ్లో ఎన్టీఆర్ భుజానికి గాయం కావడంతో, వైద్యులు ఆయనకు రెండు నెలల పాటు విశ్రాంతి తీసుకోవాలని సూచించారు. దీంతో ఈ సినిమా చిత్రీకరణకు తాత్కాలికంగా విరామం ఇచ్చారు.
ఇతర స్టార్ హీరోల పరిస్థితి కూడా ఇలాగే ఉంది. పవన్ కళ్యాణ్ ఇటీవల ముంబైలో భుజానికి శస్త్ర చికిత్స చేయించుకున్నారు. ప్రస్తుతం చేతికి కట్టుతోనే విధుల్లో పాల్గొంటున్నప్పటికీ, ఆయన నటిస్తున్న 'OG 2' సినిమా షూటింగ్ ఆలస్యం కానుంది. మరోవైపు, 'NBK111' షూటింగ్లో గాయపడిన బాలకృష్ణ మోకాలికి ఆపరేషన్ చేయించుకుని ఆసుపత్రిలో విశ్రాంతి తీసుకుంటున్నారు. ఆయనకు వైద్యులు నెల రోజుల విశ్రాంతిని సూచించారు.
రామ్ చరణ్ కూడా మణికట్టు గాయంతో ఇబ్బంది పడుతున్నారు. 'పెద్ది' సినిమా షూటింగ్ సమయంలోనే గాయపడినప్పటికీ, ప్రమోషన్ల కోసం ఆపరేషన్ను వాయిదా వేస్తూ వచ్చారు. చివరకు ఇవాళ ఉదయం కోయంబత్తూర్లో ఆయన మణికట్టుకు ఆపరేషన్ జరిగింది. వరుణ్ తేజ్ 'బరి' సినిమా షూటింగ్లో కాలికి గాయం కావడంతో ఆపరేషన్ చేయించుకుని, గత నెల రోజులుగా ఇంట్లోనే విశ్రాంతి తీసుకుంటున్నారు.
గతంలో చిరంజీవి 'శంకర వరప్రసాద్' షూటింగ్లో మోకాలి ఆపరేషన్ చేయించుకోగా, అఖిల్ తన ఇంట్లో జారిపడి గాయపడటంతో 'లెనిన్' సినిమా షూటింగ్ ఆలస్యమైంది. అలాగే ప్రభాస్ మోకాలి ఆపరేషన్, సాయి ధరమ్ తేజ్ 'సంబరాల ఏటిగట్టు' షూటింగ్లో గాయపడటం వంటి ఘటనలు చోటుచేసుకున్నాయి. ఇలా వరుసగా హీరోలు గాయపడి ఆపరేషన్ల వరకు వెళ్తుండటంతో, తమ అభిమాన హీరోలు త్వరగా కోలుకోవాలని అభిమానులు కోరుకుంటున్నారు.
