వానాకాలంలో లభించే పండ్లలో సీతాఫలం ప్రత్యేకమైనది. ప్రతి వంద గ్రాముల సీతాఫలం నుంచి శరీరానికి 94 కిలోకేలరీల శక్తి అందుతుంది. ఇందులో 71 శాతం నీరు ఉండటంతో పాటు విటమిన్లు, ఖనిజాలు పుష్కలంగా ఉంటాయి.
దక్షిణ అమెరికా, మధ్య అమెరికా మరియు కరీబియన్ దీవులకు చెందిన ఈ ఫలం, పదహారో శతాబ్దంలో పోర్చుగీసు వర్తకుల ద్వారా భారత్కు పరిచయమైంది. ఈ పండు రుచిని ఇష్టపడే భారతీయులు, దీనిని విరివిగా సాగు చేస్తూ ప్రపంచంలోనే అగ్రస్థానానికి చేర్చారు.
ప్రస్తుతం సీతాఫలాల ఉత్పత్తిలో భారత్ ప్రపంచంలోనే మొదటి స్థానంలో కొనసాగుతోంది. పోషకాల సిరులఫలంగా పిలిచే ఈ పండు, ఆరోగ్యానికి అవసరమైన పోషకాలను అందించడంలో కీలక పాత్ర పోషిస్తుంది.
