కేంద్ర ప్రభుత్వ ఆధ్వర్యంలో నడిచే CBSE స్కూళ్లలో మూడు భాషలను బోధించే త్రిభాషా విధానం ఇప్పటికే అమలవుతోంది. అయితే, ఈ విధానాన్ని సవాలు చేస్తూ కొందరు సుప్రీంకోర్టును ఆశ్రయించారు. అత్యవసరంగా ఈ విధానాన్ని అమలు చేయాల్సిన అవసరం లేదని పిటిషనర్లు కోర్టుకు తెలిపారు.
ఈ అంశంపై విచారణ జరిపిన సుప్రీంకోర్టు, త్రిభాషా విధానంపై సమీక్షించాలని కేంద్రాన్ని, CBSE బోర్డును ఆదేశించింది. అత్యవసరంగా దీన్ని ఎందుకు అమలు చేస్తున్నారని బోర్డును కోర్టు ప్రశ్నించింది. విద్యార్థుల ఆసక్తిని, వారి అవసరాలను కూడా దృష్టిలో ఉంచుకోవాలని కోర్టు సూచించింది.
పిటిషనర్ల వాదన ప్రకారం, త్రిభాషా విధానం అమలుకు అవసరమైన పుస్తకాలు చాలా చోట్ల అందుబాటులో లేవు. భాషా శాస్త్రం బోధించేందుకు తగిన ఉపాధ్యాయులు కూడా లేరు. పరీక్షలు దగ్గరపడుతున్నా, ఈ కొరత వల్ల చాలా పాఠశాలల్లో భాషా బోధన ఇంకా ప్రారంభం కాలేదని వారు కోర్టుకు వివరించారు.
విద్యార్థులు గతంలో ఎప్పుడూ అలవాటు లేని భాషను ఇప్పుడు చదవాల్సి రావడం వారి చదువుపై ప్రభావం చూపుతుందని పిటిషనర్లు ఆందోళన వ్యక్తం చేశారు. దీనిపై ప్రభుత్వం తరఫున సొలిసిటర్ జనరల్ ఐశ్వర్య భాటి స్పందించారు. త్రిభాషా విధానం అమలుకు ముందస్తు చర్యలు తీసుకున్నామని, అవసరమైన మెటీరియల్ కూడా అందజేశామని ఆమె కోర్టుకు తెలిపారు.
ఈ విధానం అమలును తాము తప్పుబట్టడం లేదని కోర్టు స్పష్టం చేసింది. అయితే, ఆరో తరగతి విద్యార్థులకు త్రిభాషా విధానం అమలుపై మళ్లీ సమీక్షించాలని సూచించింది. ఇంగ్లీష్ స్థానిక భాష కాదనే CBSE నిర్ణయాన్ని కూడా సమీక్షిస్తామని కోర్టు పేర్కొంది.
ఈ కేసుపై తదుపరి విచారణను మరో పది రోజులకు వాయిదా వేస్తున్నట్లు సుప్రీంకోర్టు ప్రకటించింది. ఆ సమయానికి తదుపరి చర్యలపై స్పష్టత వచ్చే అవకాశం ఉంది.
