నర్సంపేట మాజీ ఎమ్మెల్యే పెద్ది సుదర్శన్ రెడ్డి ప్రస్తుతం సికింద్రాబాద్లోని యశోద ఆసుపత్రిలో అడ్వాన్స్డ్ క్రిటికల్ కేర్ యూనిట్లో చికిత్స పొందుతున్నారు. ఊపిరితిత్తుల్లో రక్తం గడ్డకట్టడం (పల్మనరీ ఎంబోలిజం) కారణంగా ఆయనకు గుండెపోటు రావడంతో ప్రాథమికంగా వరంగల్లో చికిత్స అందించారు. అక్కడ వైద్యులు 45 నిమిషాల పాటు సీపీఆర్, ఏసీఎల్ఎస్ పద్ధతుల్లో అత్యవసర వైద్యం చేసి గుండె స్పందనను తిరిగి తెచ్చారు. అనంతరం మెరుగైన వైద్యం కోసం ఆయనను సికింద్రాబాద్కు తరలించారు.
ఆసుపత్రి చీఫ్ ఆపరేటింగ్ ఆఫీసర్ డాక్టర్ జి. విజయ్ కుమార్ మంగళవారం విడుదల చేసిన హెల్త్ బులెటిన్ ప్రకారం, సుదర్శన్ రెడ్డి పరిస్థితి ఇంకా విషమంగానే ఉంది. 45 నిమిషాల పాటు గుండె ఆగిపోవడం వల్ల ఆయన నాడీ వ్యవస్థ తీవ్రంగా దెబ్బతిన్నట్లు వైద్యులు గుర్తించారు. ఈఈజీ, ఎంఆర్ఐ బ్రెయిన్, టీసీడీఎస్ పరీక్షల్లో మెదడుకు ఆక్సిజన్ అందలేదని తేలింది. ప్రస్తుతం ఆయన శబ్దాలకు, స్పర్శకు లేదా నొప్పికి ఎలాంటి ప్రతిస్పందన ఇవ్వడం లేదు.
ప్రస్తుతం క్రిటికల్ కేర్, పల్మనాలజీ, కార్డియాలజీ, న్యూరాలజీ విభాగాల నిపుణుల బృందం ఆయనకు వైద్యం అందిస్తోంది. వెంటిలేటర్ సాయంతో శ్వాసక్రియ, రక్తపోటు అందుబాటులో ఉన్నప్పటికీ, ఆయన ఆరోగ్య పరిస్థితి క్లిష్టంగా ఉందని వైద్యులు పేర్కొన్నారు. మాజీ ముఖ్యమంత్రి కేసీఆర్, మంత్రి పొంగులేటి శ్రీనివాసరెడ్డి ఆసుపత్రికి వెళ్లి ఆయనను పరామర్శించి, కుటుంబ సభ్యులకు ధైర్యం చెప్పారు.
వచ్చే 72 గంటల సమయం కీలకమని వైద్యులు తెలిపారు. ఈ గడువు ముగిసిన తర్వాత జాతీయ, అంతర్జాతీయ వైద్య ప్రమాణాల ప్రకారం న్యూరో అసెస్మెంట్ నిర్వహించి, మెదడు పనితీరుపై మరింత స్పష్టత ఇవ్వనున్నట్లు ఆసుపత్రి వర్గాలు వెల్లడించాయి.
