యెమెన్లోని హూతీ తిరుగుబాటుదారులు సౌదీ అరేబియాపై దాడులను పెంచారు. ఇందులో భాగంగా రియాద్ నగరంపై క్షిపణిని ప్రయోగించడంతో భారీ పేలుడు శబ్దాలు వినిపించాయి. అంతర్జాతీయ విమానాశ్రయం సమీపంలో మంటలు, దట్టమైన పొగ వ్యాపించినట్లు స్థానికులు గుర్తించారు.
ఈ దాడిని సౌదీ అరేబియా ప్రభుత్వం ధ్రువీకరించింది. హూతీలపై పోరాడుతున్న సంకీర్ణ దళాలు, క్షిపణిని గాలిలోనే అడ్డుకున్నట్లు వెల్లడించాయి. అయితే, ఈ దాడి జరిగిన తర్వాత సంకీర్ణ దళాలు చాలా ఆలస్యంగా ప్రకటన చేశాయి.
మరోవైపు, రియాద్లోని సున్నితమైన ప్రాంతాలతో పాటు యన్బులో ఉన్న సౌదీ చమురు సంస్థ అరామ్కో (Aramco) సౌకర్యాలను తాము లక్ష్యంగా చేసుకున్నామని హూతీలు ప్రకటించారు. అయితే, ప్రపంచంలోనే అతిపెద్ద చమురు సంస్థ అయిన అరామ్కో ఈ వ్యాఖ్యలపై స్పందించేందుకు నిరాకరించింది.
పశ్చిమాసియాలో పెరుగుతున్న ఉద్రిక్తతల నేపథ్యంలో, అమెరికా విదేశాంగ శాఖ తమ పౌరులకు భద్రతా హెచ్చరిక జారీ చేసింది. దాడులు తీవ్రమయ్యే అవకాశం ఉన్నందున, ఆయా దేశాల్లో ఉన్న అమెరికన్లు అప్రమత్తంగా ఉండాలని సూచించింది.
విమానాల రద్దు, గగనతల మూసివేత వంటి ప్రయాణ అంతరాయాలు తలెత్తవచ్చని అమెరికా హెచ్చరించింది. ప్రయాణీకులు విమాన షెడ్యూళ్లను ఎప్పటికప్పుడు గమనిస్తూ ఉండాలని, ఆహారం, నీరు, అత్యవసర మందులను సిద్ధంగా ఉంచుకోవాలని కోరింది.
ఇరాన్ మద్దతు ఉన్న దళాలు గల్ఫ్ దేశాల్లోని అమెరికా కార్యాలయాలు, ఆస్తులను లక్ష్యంగా చేసుకునే ప్రమాదం ఉందని అమెరికా విదేశాంగ శాఖ పేర్కొంది. కాబట్టి, పౌరులు తమ చుట్టుపక్కల జరుగుతున్న పరిణామాలను నిరంతరం గమనిస్తూ సురక్షిత ప్రాంతాలకు వెళ్లాలని సూచించింది.
