సర్పంచ్ ఎన్నికల ప్రక్రియలో ముఖ్యమంత్రి చంద్రబాబు నాయుడు జోక్యం చేసుకోవడం సిగ్గుచేటని మాజీ ఎమ్మెల్యే టీజేఆర్ సుధాకర్ బాబు మండిపడ్డారు. బాబు పాలనలో ప్రజలకు చెప్పుకోదగ్గ ఒక్క మంచి పని కూడా జరగలేదని, ఆయన తీరు మేకతోలు కప్పుకున్న గుంట నక్కలా ఉందని ఆయన వ్యాఖ్యానించారు.
స్థానిక సంస్థల ఎన్నికల్లో ఓట్లు అడిగితే ప్రజలు చీపుర్లతో కొడుతున్నారని, అందుకే ప్రభుత్వం అరాచకాలకు దిగుతోందని సుధాకర్ బాబు ఆరోపించారు. గతంలో మున్సిపల్ ఎన్నికల్లో చేసినట్లే, ఇప్పుడు సర్పంచ్ ఎన్నికల్లో కూడా దాడులు చేస్తున్నారని ఆయన పేర్కొన్నారు. వైఎస్సార్ సీపీ (YSRCP) కార్యకర్తలు నామినేషన్లు వేయడానికి కూడా ధర్నాలు చేయాల్సిన పరిస్థితి ఏర్పడిందని ఆయన ఆవేదన వ్యక్తం చేశారు.
పోలీసులు పూర్తిగా టీడీపీ నేతలకు తొత్తులుగా మారి పని చేస్తున్నారని సుధాకర్ బాబు ఆరోపించారు. కూటమి పార్టీల అభ్యర్థుల నుంచి డబ్బులు తీసుకుని, ఎన్నికలను ఏకగ్రీవం చేస్తున్నారని ఆయన విమర్శించారు. ఈ అక్రమ వసూళ్లను పోలీసులు, ఎన్నికల అధికారులు పంచుకుంటున్నారని ఆయన ఆరోపణలు చేశారు.
పల్నాడు జిల్లా పాలపాడులో టీడీపీ అసంతృప్త నేతతో పాటు వైఎస్సార్ సీపీ నేతలను పోలీసులు అక్రమంగా అరెస్టు చేశారని ఆయన తెలిపారు. మంత్రి రాంప్రసాదరెడ్డి స్వయంగా తమ పార్టీ నాయకులకు ఫోన్ చేసి బెదిరిస్తున్నారని ఆయన ఆరోపించారు. పోలీసులు, టీడీపీ కార్యకర్తలు కలిసి తమ పార్టీ అభ్యర్థుల నామినేషన్ పత్రాలను చించేశారని ఆయన పేర్కొన్నారు.
అన్నమయ్య జిల్లా రాయచోటిలో కూడా తమ పార్టీ వారిపై దాడులు జరిగాయని సుధాకర్ బాబు వివరించారు. రాయలసీమ నుంచి పల్నాడు వరకు దాడులు, దౌర్జన్యాలు కొనసాగుతున్నాయని ఆయన ఆరోపించారు. ప్రజాస్వామ్యాన్ని నడిరోడ్డుపై ఖూనీ చేస్తున్న ఇలాంటి మంత్రులను మంత్రివర్గం నుంచి వెంటనే భర్తరఫ్ చేయాలని ఆయన డిమాండ్ చేశారు.








