ఆర్ఎస్ఎస్ (రాష్ట్రీయ స్వయంసేవక్ సంఘ్) సంస్థ జైష్-ఎ-మొహమ్మద్, తాలిబన్ వంటి ఉగ్రవాద సంస్థలతో సమానమని కర్ణాటక కాంగ్రెస్ అధ్యక్షుడు బి.కె. హరిప్రసాద్ వ్యాఖ్యానించారు. ఈ మూడు సంస్థలు దేశంలో ఎక్కడా రిజిస్టర్ కాలేదని ఆయన పేర్కొన్నారు. ఆర్ఎస్ఎస్ తన శాఖల్లో వందేమాతరం, జాతీయ గీతం పాడదని, త్రివర్ణ పతాకాన్ని ఎగురవేయదని హరిప్రసాద్ ఆరోపణలు చేశారు.
ఈ వ్యాఖ్యలపై కర్ణాటక మంత్రి యతీంద్ర సిద్ధరామయ్య కూడా స్పందించారు. ఆర్ఎస్ఎస్ వెయ్యి తలల విషసర్పం లాంటిదని, కులవాదం, మతతత్వం, మనువాదంతో సమాజాన్ని విషపూరితం చేస్తోందని ఆయన విమర్శించారు. మరోవైపు, ఆర్ఎస్ఎస్ రిజిస్ట్రేషన్, నిధులు, కార్యకలాపాల వివరాలను బయటపెట్టాలని మంత్రి ప్రియాంక్ ఖర్గే డిమాండ్ చేశారు.
రిజిస్టర్ కాని సంస్థలు ప్రభుత్వ భవనాలు, ప్రభుత్వ ఆస్తులను వినియోగించడాన్ని నియంత్రించేందుకు కర్ణాటక కాంగ్రెస్ ప్రభుత్వం ఒక కొత్త బిల్లును తీసుకురావడానికి సిద్ధమవుతోంది. చట్టబద్ధమైన నమోదు లేని సంస్థలపై ఆంక్షలు విధించడమే ఈ నిర్ణయం ఉద్దేశమని ప్రభుత్వం చెబుతోంది.
కాంగ్రెస్ నేతల వ్యాఖ్యలను బీజేపీ తీవ్రంగా ఖండించింది. ఢిల్లీ బీజేపీ ఎంపీ ధర్మశిలాగుప్తా మాట్లాడుతూ, దేశ సంస్కృతి, సంప్రదాయాలు, అభివృద్ధి కోసం ఆర్ఎస్ఎస్ పనిచేస్తుందని చెప్పారు. దేశం ముందుండాలనే సిద్ధాంతంతోనే ఈ సంస్థ పనిచేస్తోందని ఆయన తెలిపారు.
మాజీ బీజేపీ నేత బసనగౌడ పాటిల్ కూడా హరిప్రసాద్ వ్యాఖ్యలను తప్పుబట్టారు. జైష్-ఎ-మొహమ్మద్ వంటి సంస్థల మాదిరిగా ఆర్ఎస్ఎస్ ఎవరిపై బాంబులు వేసిందని ఆయన ప్రశ్నించారు. ఈ వివాదాస్పద వ్యాఖ్యలతో కర్ణాటక రాజకీయాల్లో తీవ్ర చర్చ మొదలైంది.
