పార్లమెంట్ వర్షాకాల సమావేశాల నేపథ్యంలో నిర్వహించిన ఆల్-పార్టీ సమావేశంలో డీలిమిటేషన్ (నియోజకవర్గాల పునర్విభజన) బిల్లుపై చర్చ జరిగింది. ఈ బిల్లుకు డీఎంకే మద్దతు తెలిపిందని ఆర్ఎస్పీ లోక్సభ ఎంపీ ఎస్కే ప్రేమచంద్రన్ పేర్కొనడం రాజకీయంగా చర్చకు దారితీసింది.
అయితే, ఈ వ్యాఖ్యలను డీఎంకే రాజ్యసభ ఎంపీ తిరుచి శివ స్పష్టం చేశారు. ప్రభుత్వం ఇప్పటివరకు బిల్లుపై ఎలాంటి స్పష్టమైన ప్రతిపాదనలు తీసుకురాలేదని ఆయన తెలిపారు. దక్షిణాది రాష్ట్రాల ప్రయోజనాలు దెబ్బతినకూడదని, మహిళా రిజర్వేషన్లను ప్రస్తుతం ఉన్న స్థానాల్లోనే అమలు చేయాలని ఆయన పేర్కొన్నారు.
కేంద్ర హోం మంత్రి అమిత్ షా గతంలో లోక్సభలో చెప్పినట్లుగా, అన్ని రాష్ట్రాల్లో లోక్సభ స్థానాలను 50 శాతం పెంచే అంశంపై ప్రభుత్వం నుంచి స్పష్టమైన హామీ వస్తే మద్దతు ఇచ్చే అంశాన్ని పరిశీలిస్తామని డీఎంకే తెలిపింది. 2026లో నియోజకవర్గాల పునర్విభజన చేపట్టే అవకాశం ఉన్న నేపథ్యంలో, లోక్సభ స్థానాలను 543 నుంచి 850కు పెంచాలని ప్రభుత్వం భావిస్తోంది.
రాజ్యాంగ సవరణ బిల్లు కావడంతో దీని ఆమోదానికి మూడింట రెండొంతుల మెజారిటీ అవసరం. ప్రస్తుతం ఎన్డీయేకు 319 మంది ఎంపీల మద్దతు ఉండగా, బిల్లు పాస్ కావడానికి మరో 41 ఓట్లు అవసరం. లోక్సభలో 22 మంది ఎంపీలు ఉన్న డీఎంకే మద్దతు ఇస్తే లేదా ఓటింగ్కు దూరంగా ఉంటే ఎన్డీయేకు ఈ బిల్లును ఆమోదింపజేసుకోవడం సులభతరమవుతుంది.
