రానున్న అసెంబ్లీ మరియు శాసనమండలి సమావేశాలకు పూర్తి సన్నద్ధతతో వెళ్లాలని వైసీపీ శాసనసభాపక్ష సభ్యులకు మాజీ సీఎం వైఎస్ జగన్ సూచించారు. ప్రజా సమస్యలపై గతంలో మాదిరిగానే ఈసారి కూడా మరింత పట్టుదలగా పోరాడాలని ఆయన పార్టీ నేతలను కోరారు.
వైసీపీకి ప్రధాన ప్రతిపక్ష హోదా కల్పించేందుకు ప్రభుత్వం నిరాకరిస్తోందని జగన్ విమర్శించారు. ప్రధాన ప్రతిపక్ష నాయకుడికి సభలో మాట్లాడే హక్కు ఉంటుందని, ఆ అవకాశం దక్కకుండా చేసేందుకే చంద్రబాబు ఈ హోదాను నిరాకరిస్తున్నారని ఆయన ఆరోపించారు. దీంతో అసెంబ్లీలో పార్టీ తరఫున గళం వినిపించే అవకాశాలు పరిమితంగా ఉన్నాయని జగన్ పేర్కొన్నారు.
అసెంబ్లీలో ప్రభుత్వం ప్రస్తావించే అంశాలకు సంబంధించి ఆధారాలు, సాక్ష్యాలతో తాను ప్రెస్మీట్లు నిర్వహిస్తానని జగన్ ప్రకటించారు. ప్రతి విషయంలోనూ వాస్తవాలను ప్రజల ముందు ఉంచుతామని, నాణేనికి రెండోవైపు చూపిస్తామని ఆయన స్పష్టం చేశారు. ప్రభుత్వం చెప్పే అంశాల్లోని నిజానిజాలను ఆధారాలతో బయటపెట్టాలని పార్టీ నేతలకు దిశానిర్దేశం చేశారు.
శాసనమండలిలో వైసీపీకి ఉన్న బలాన్ని ప్రజా సమస్యల పరిష్కారం కోసం సమర్థంగా ఉపయోగించుకోవాలని జగన్ సూచించారు. అసెంబ్లీలో అవకాశాలు తక్కువగా ఉన్నప్పటికీ, మండలి వేదికగా ప్రజల గొంతుకను బలంగా వినిపించాలని ఆయన పార్టీ సభ్యులకు స్పష్టం చేశారు. ప్రజా సమస్యలపై గతంలో చేసిన పోరాట స్ఫూర్తితోనే ముందుకు సాగాలని ఆయన పిలుపునిచ్చారు.
