టాలీవుడ్లో ఒకప్పుడు ఏడాదికి రెండు మూడు సినిమాలు చేసిన స్టార్ హీరోలు, ఇప్పుడు ఒక్కో సినిమాకు రెండు మూడేళ్లు సమయం తీసుకుంటున్నారు. రామ్ చరణ్ 'గేమ్ ఛేంజర్' (పెద్ది) కోసం రెండేళ్లు, ఎన్టీఆర్ 'డ్రాగన్' కోసం, మహేష్ బాబు 'వారణాసి' కోసం సుదీర్ఘ సమయం కేటాయిస్తున్నారు. ఇలా ఒకే ప్రాజెక్టుపై ఏళ్ల తరబడి పనిచేయడం వల్ల సినిమాల మేకింగ్ ఖర్చులు పెరిగిపోతున్నాయి.
అయితే, గతంలో 'బాహుబలి', 'సాహో' సినిమాల కోసం సుదీర్ఘ విరామం తీసుకున్న ప్రభాస్ ఇప్పుడు తన పద్ధతి మార్చుకున్నారు. 'ది రాజా సాబ్' రిలీజ్కు ముందే హను రాఘవపూడి దర్శకత్వంలో 'ఫౌజీ'ని పట్టాలెక్కించారు. అంతేకాకుండా, సందీప్ వంగ దర్శకత్వంలో 'స్పిరిట్' సినిమాను కూడా లైన్లో పెట్టారు.
అల్లు అర్జున్ కూడా ఇదే బాటలో పయనిస్తున్నారు. 'పుష్ప' తర్వాత 'రాకా' సినిమాను సెట్స్ పైకి తీసుకెళ్లిన ఆయన, ఆ సినిమా షూటింగ్ జరుగుతుండగానే లోకేష్ కనగరాజ్ దర్శకత్వంలో మరో చిత్రానికి గ్రీన్ సిగ్నల్ ఇచ్చారు. ఇలా ఒకేసారి రెండు మూడు ప్రాజెక్టులను లైనప్ చేయడం వల్ల అభిమానులు సంతోషంగా ఉన్నారని ఇండస్ట్రీ వర్గాల సమాచారం.
భారీ ప్రాజెక్టులు చేస్తున్న హీరోలు ప్యారలల్గా మరో సినిమాను సెట్స్ పైకి తీసుకెళ్తే, ప్రతి ఏడాది ఒక సినిమా విడుదలయ్యే అవకాశం ఉంటుంది. దీనివల్ల బడ్జెట్లు అదుపులో ఉండటమే కాకుండా బాక్సాఫీస్ కూడా కళకళలాడుతుంది. ప్రభాస్, బన్నీ స్టైల్ను మిగతా హీరోలు కూడా అనుసరిస్తారా లేదా అనేది ఇప్పుడు ఆసక్తికరంగా మారింది.
