అక్కినేని సుమంత్ కథానాయకుడిగా నటించిన ఇన్వెస్టిగేటివ్ క్రైమ్ థ్రిల్లర్ 'న్యూటన్స్ 3rd లా' ట్రైలర్ తాజాగా విడుదలైంది. వాసుదేవ్ అనే పవర్ఫుల్ పోలీస్ ఆఫీసర్ పాత్రలో సుమంత్ కనిపిస్తుండగా, ఒక అనుమానాస్పద హత్య కేసు చుట్టూ కథ సాగుతుంది. ఈ చిత్రంలో సీనియర్ నటుడు జగపతి బాబు కీలక పాత్ర పోషిస్తున్నారు.
గత పదేళ్లలో తాను విన్న కథల్లో 'మళ్లీ రావా' తర్వాత వెంటనే అంగీకరించిన రెండో సినిమా ఇదేనని సుమంత్ పేర్కొన్నారు. ఈ ప్రాజెక్టులో తన పాత్ర కంటే స్క్రీన్ప్లేనే ప్రధాన ఆకర్షణ అని ఆయన తెలిపారు. థ్రిల్లర్ అంశాలతో పాటు బలమైన ఫ్యామిలీ ఎమోషన్స్ ఉండటంతో ఈటీవీ ఈ చిత్రాన్ని నిర్మించింది. ఈటీవీ నుంచి పరిచయమవుతున్న 15వ దర్శకుడి సినిమా ఇది.
ఈ కార్యక్రమానికి ముఖ్య అతిథిగా హాజరైన హీరో అడివి శేష్ చిత్రబృందానికి మద్దతు తెలిపారు. న్యూటన్ మూడో నియమం ప్రకారం ప్రతి చర్యకు సమానమైన ప్రతిచర్య ఉంటుందనే కాన్సెప్ట్ను ఈ కథతో ఎలా ముడిపెట్టారనేది ఆసక్తికరంగా మారింది. ప్రతి నేరం వెనుక ఉన్న కారణాలను అన్వేషించే ఈ క్రైమ్ థ్రిల్లర్ జూలై 31న విడుదల కానుంది.
