గత ఏడాది విడుదలైన ‘థగ్ లైఫ్’ తర్వాత అగ్ర నటుడు కమల్హాసన్ మరే కొత్త సినిమాను ప్రారంభించలేదు. నెల్సన్ దిలీప్కుమార్ దర్శకత్వంలో రజనీకాంత్తో కలిసి చేయాల్సిన మల్టీస్టారర్ సినిమా, అలాగే స్టంట్ మాస్టర్ అన్బరివ్ దర్శకత్వంలో చేయాల్సిన సినిమా కేవలం ప్రకటనలకే పరిమితమయ్యాయి.
ఈ నేపథ్యంలో అభిమానులకు సర్ప్రైజ్ ఇస్తూ, ఎస్.యు.అరుణ్కుమార్ దర్శకత్వంలో కొత్త చిత్రానికి కమల్హాసన్ శ్రీకారం చుట్టారు. ఈ సినిమా కోసం ఆయన గురువారం లుక్ టెస్ట్ గ్లింప్స్ను విడుదల చేశారు. గ్లింప్స్ అంటే సినిమాలోని పాత్ర ఎలా ఉండబోతుందో చూపించే చిన్న వీడియో క్లిప్పింగ్.
ఈ వీడియోలో కమల్హాసన్ సాల్ట్ అండ్ పెప్పర్ లుక్లో, చేతిలో ఆయుధాన్ని పట్టుకుని పవర్ఫుల్గా కనిపిస్తున్నారు. ఫస్ట్లుక్ను బట్టి చూస్తుంటే, ఈ సినిమాను యాక్షన్ ప్రధానంగా తెరకెక్కిస్తున్నట్లు స్పష్టమవుతోంది.
‘సేతుపతి’, ‘చిత్తా’ వంటి చిత్రాలతో తమిళ సినీ పరిశ్రమలో మంచి గుర్తింపు తెచ్చుకున్న దర్శకుడు ఎస్.యు.అరుణ్కుమార్, ఇప్పుడు కమల్హాసన్ను డైరెక్ట్ చేయడంపై ఆసక్తి నెలకొంది. ఈ చిత్రాన్ని రాజ్కమల్ఫిల్మ్స్ ఇంటర్నేషనల్, టర్మరిక్ మీడియా ప్రైవేట్ లిమిటెడ్ పతాకాలపై కమల్హాసన్, ఆర్.మహేంద్రన్ కలిసి నిర్మిస్తున్నారు.
ఈ సినిమా షూటింగ్ను త్వరలోనే ప్రారంభించనున్నట్లు మేకర్స్ తెలిపారు. ఈ ప్రాజెక్టుతో కమల్హాసన్ మళ్లీ సెట్స్పైకి రానున్నారు.
