తెలంగాణలో ఫీజు రీయింబర్స్మెంట్ బకాయిలు విడుదల చేయకపోవడం వల్ల సుమారు 20 లక్షల మంది ఎస్సీ, ఎస్టీ, బీసీ, ఈబీసీ విద్యార్థుల భవిష్యత్తు ప్రమాదంలో పడిందని బీజేపీ రాష్ట్ర అధ్యక్షుడు ఎన్. రాంచందర్ రావు ఆందోళన వ్యక్తం చేశారు. 2020-21 విద్యా సంవత్సరం నుంచి సుమారు రూ. 10,000 కోట్ల నుంచి రూ. 12,000 కోట్ల వరకు బకాయిలు ఉన్నాయని కళాశాలల యజమాన్యాలు కోర్టుకు తెలిపాయని ఆయన గుర్తు చేశారు.
ఫీజులు చెల్లించకపోవడంతో కళాశాలలు ఒరిజినల్ సర్టిఫికెట్లు ఇవ్వడం లేదని, దీనివల్ల వేలాది మంది విద్యార్థులు ఉన్నత చదువులకు వెళ్లలేక, ఉద్యోగ అవకాశాలను కోల్పోతున్నారని రాంచందర్ రావు పేర్కొన్నారు. ఈ అంశంపై రాష్ట్ర హైకోర్టు కూడా ప్రభుత్వాన్ని పలుమార్లు ప్రశ్నించిందని ఆయన తెలిపారు. కాంగ్రెస్ ప్రభుత్వం ఈ బకాయిలను క్లియర్ చేయకపోవడంతో విద్యార్థుల కుటుంబాలు తీవ్ర ఆర్థిక ఇబ్బందుల్లో ఉన్నాయని ఆయన వివరించారు.
దేశవ్యాప్తంగా 'చ్ఛాత్రోం కీ గూంజ్' పేరుతో పర్యటిస్తున్న రాహుల్ గాంధీ, సొంత కాంగ్రెస్ పాలిత రాష్ట్రమైన తెలంగాణలో విద్యార్థుల బాధలను ఎప్పుడు వింటారని రాంచందర్ రావు ప్రశ్నించారు. 2023 ఎన్నికల సమయంలో అశోక్ నగర్లో ఇచ్చిన జాబ్ క్యాలెండర్, నిరుద్యోగ భృతి హామీలు రెండేళ్లన్నర గడిచినా నెరవేరలేదని ఆయన విమర్శించారు.
రాహుల్ గాంధీకి విద్యార్థులపై నిజంగా ప్రేమ ఉంటే, అశోక్ నగర్లోనే 'చ్ఛాత్రోం కీ గూంజ్' కార్యక్రమాన్ని నిర్వహించాలని రాంచందర్ రావు సవాల్ విసిరారు. అక్కడ యువత అడిగే ప్రశ్నలకు ఆయన సమాధానం చెప్పాలని ఆయన డిమాండ్ చేశారు.
