భారతదేశ పర్యాటక విశేషాలను దేశీయ, అంతర్జాతీయ ప్రయాణికులకు చేరువ చేసే లక్ష్యంతో కేంద్ర పర్యాటక శాఖ, ఇండిగో సంస్థ మధ్య అవగాహన ఒప్పందం (ఎంఓయూ) కుదిరింది. ఈ భాగస్వామ్యం ద్వారా 'ఇన్క్రెడిబుల్ ఇండియా బై ఇండిగో' అనే ప్రత్యేక ప్రచార కార్యక్రమాన్ని అమలు చేయనున్నారు.
ఈ ఒప్పందంపై కేంద్ర పర్యాటక, సాంస్కృతిక శాఖ మంత్రి గజేంద్ర సింగ్ షెకావత్ స్పందిస్తూ, భారత పర్యాటక కథను ప్రపంచవ్యాప్తంగా ఉన్న కోట్లాది మంది ప్రయాణికులకు చేరవేస్తామని చెప్పారు. ఇండిగోకు ఉన్న విస్తృత అంతర్జాతీయ విమాన నెట్వర్క్ను ఇందుకోసం వినియోగించుకోనున్నారు.
దేశంలోని ఆధ్యాత్మిక, సాంస్కృతిక, ప్రకృతి మరియు ఆరోగ్య పర్యాటక కేంద్రాలను ఈ ప్రచారం ద్వారా ప్రపంచానికి పరిచయం చేయనున్నారు. దీనివల్ల విదేశీ పర్యాటకుల రాక పెరిగి, భారత పర్యాటక రంగానికి మరింత బలం చేకూరుతుందని మంత్రి పేర్కొన్నారు.
ప్రధానమంత్రి నరేంద్ర మోదీ నాయకత్వంలో భారత్ను ప్రపంచంలోనే అత్యంత ప్రాధాన్యత కలిగిన పర్యాటక గమ్యస్థానంగా మార్చాలనే లక్ష్యానికి ఈ ఒప్పందం తోడ్పడుతుందని షెకావత్ అభిప్రాయపడ్డారు. 'బ్రాండ్ ఇండియా'ను మరింత బలోపేతం చేయడంలో ఈ భాగస్వామ్యం కీలక పాత్ర పోషించనుంది.
