కరాచీలోని నజీమాబాద్లో ఉన్న హమ్దర్ద్ ఆసుపత్రిలో ఆగస్టు 27న ఈ ఘటన చోటుచేసుకుంది. తొమ్మిది నెలల గర్భవతినని, 38 వారాల గర్భం ఉందని చూపే అల్ట్రాసౌండ్ నివేదికను చూపించి ఆ మహిళ ఆసుపత్రిలో చేరింది. కుటుంబ సభ్యులు ఆమెకు ప్రసవం జరగబోతోందని ఆశగా ఎదురుచూశారు.
అయితే, గర్భస్థ శిశువును బయటకు తీయడానికి చేసే సి-సెక్షన్ (శస్త్రచికిత్స ద్వారా బిడ్డను బయటకు తీసే ప్రక్రియ) సమయంలో ఆమె గర్భంలో బిడ్డ లేదని వైద్యులు గుర్తించారు. దీంతో ఆసుపత్రిలో గందరగోళం నెలకొనగా, విషయం పోలీసుల వరకు చేరింది.
పోలీసుల దర్యాప్తులో ఆ మహిళ అసలు గర్భవతి కాదని తేలింది. ఆమెకు పెళ్లై మూడేళ్లు గడుస్తున్నా గర్భం దాల్చలేదు. అత్తమామలు, భర్త ఒత్తిడి నుంచి తప్పించుకోవడానికి తాను గర్భవతినని అబద్ధం చెప్పానని, కాలక్రమేణా నిజంగా గర్భం దాల్చుతానని ఆశించానని ఆమె ఒప్పుకుంది.
ఈ ఘటనపై ఆసుపత్రి పాత్రపై కూడా ప్రశ్నలు తలెత్తుతున్నాయి. గర్భవతి కానప్పుడు ఆపరేషన్ ఎందుకు చేశారని విమర్శలు వస్తుండగా, ఆమె చూపిన అల్ట్రాసౌండ్ రిపోర్టుల ఆధారంగానే వైద్య ప్రక్రియలు చేపట్టామని ఆసుపత్రి యాజమాన్యం చెబుతోంది.
ఏదైనా సి-సెక్షన్ ఆపరేషన్కు ముందు గర్భ నిర్ధారణ, శారీరక పరీక్షలు తప్పనిసరి అని నిపుణులు పేర్కొంటున్నారు. ఈ నేపథ్యంలో, ఆసుపత్రి నిర్లక్ష్యంపై సంబంధిత ఆరోగ్య కమిషన్ విచారణ చేస్తోంది. ప్రస్తుతం పోలీసులు ఈ కేసుపై దర్యాప్తు కొనసాగిస్తున్నారు.
