ఆధునిక జీవనశైలిలో ఒత్తిడి, అనారోగ్యకరమైన ఆహారం తీసుకోవడం సాధారణంగా మారాయి. అయితే వీటి ప్రభావం కేవలం మానసిక స్థితిపైనే కాకుండా, గుండె ఆరోగ్యంపై కూడా పడుతుందని వైద్యులు చెబుతున్నారు. ముఖ్యంగా ఎక్కువ కాలం ఒత్తిడికి గురికావడం వల్ల రక్తంలో కొలెస్ట్రాల్ స్థాయిలు పెరిగి, రక్తనాళాల్లో అడ్డంకులు ఏర్పడే ప్రమాదం ఉంది.

మనం ఒత్తిడికి లోనైనప్పుడు శరీరంలో కార్టిసాల్, అడ్రినలిన్ వంటి హార్మోన్లు విడుదలవుతాయి. ఇవి అత్యవసర పరిస్థితులను ఎదుర్కొనేందుకు శరీరాన్ని సిద్ధం చేసే 'ఫైట్ ఆర్ ఫ్లైట్' (ప్రమాదాన్ని ఎదుర్కోవడం లేదా తప్పించుకోవడం) ప్రతిస్పందనలో భాగంగా పనిచేస్తాయి. అయితే ఒత్తిడి ఎక్కువ కాలం కొనసాగితే, కార్టిసాల్ స్థాయిలు పెరిగి కాలేయం మరింత గ్లూకోజ్, కొలెస్ట్రాల్, ట్రైగ్లిజరైడ్ల ఉత్పత్తిని పెంచుతుంది.

ఒత్తిడి వల్ల ఆహారపు అలవాట్లు కూడా మారుతాయి. ఆకలిని నియంత్రించే హార్మోన్లలో మార్పులు రావడం వల్ల, ఒత్తిడిలో ఉన్నప్పుడు తీపి, కొవ్వు ఎక్కువగా ఉండే ఆహారాలు తినాలనే కోరిక పెరుగుతుంది. దీనివల్ల ప్యాకేజ్డ్ స్నాక్స్, ఫాస్ట్ ఫుడ్ వంటి అల్ట్రా-ప్రాసెస్డ్ (అధికంగా శుద్ధి చేసిన) ఆహారాలను తీసుకోవడం వల్ల కొలెస్ట్రాల్ స్థాయిలపై ప్రతికూల ప్రభావం పడుతుంది.

నిరంతరం ఒత్తిడికి గురికావడం వల్ల శరీరంలో స్వల్పస్థాయి వాపులు పెరిగి, గుండె జబ్బులు, మధుమేహం వంటి చాలా కాలంగా ఉన్న సమస్యలు వచ్చే అవకాశం ఉందని పరిశోధనలు సూచిస్తున్నాయి. అలాగే కొందరు ఒత్తిడిని తగ్గించుకోవడానికి మద్యం తీసుకోవడం వల్ల ట్రైగ్లిజరైడ్ల స్థాయిలు పెరుగుతాయి. రాత్రివేళ ఆలస్యంగా తినడం వల్ల శరీరంలోకి అధిక కేలరీలు, సంతృప్త కొవ్వులు చేరే ప్రమాదం ఉంది.

ఒత్తిడి వల్ల కొలెస్ట్రాల్ పెరిగిందని చెప్పే సంకేతాల్లో తరచూ ఆందోళన, రక్తపోటు, నిద్రలేమి, అలసట, నడుము చుట్టూ కొవ్వు పెరగడం వంటివి ఉంటాయి. అయితే ఇవి ఇతర కారణాల వల్ల కూడా రావచ్చు. కాబట్టి క్రమం తప్పకుండా వ్యాయామం చేయడం, ఓట్స్, పప్పులు, కూరగాయలు, ఆలివ్ ఆయిల్ వంటి పీచు పదార్థాలు ఎక్కువగా ఉండే ఆహారం తీసుకోవడం ద్వారా గుండెను ఆరోగ్యంగా ఉంచుకోవచ్చు.

కొలెస్ట్రాల్ పరీక్షల్లో స్థాయిలు పదేపదే ఎక్కువగా వస్తుంటే వైద్యులను సంప్రదించడం చాలా ముఖ్యం. ముఖ్యంగా కుటుంబంలో గుండె జబ్బుల చరిత్ర ఉన్నవారు, రక్తపోటు, మధుమేహం ఉన్నవారు మరింత జాగ్రత్తగా ఉండాలి. ఒత్తిడిని తగ్గించేందుకు ధ్యానం, మైండ్‌ఫుల్‌నెస్ (ప్రస్తుత క్షణంపై దృష్టి పెట్టడం) వంటి పద్ధతులు పాటించడం, మద్యం, ధూమపానానికి దూరంగా ఉండడం మంచిది.