ఓటర్ల జాబితా ప్రత్యేక సమగ్ర సవరణ (SIR) ప్రక్రియపై ఎన్నికల కమిషన్ (EC) స్పష్టత ఇవ్వాలని ఎన్డీఏ కూటమిలోని భాగస్వామ్య పార్టీలు డిమాండ్ చేస్తున్నాయి. ఇప్పటికే ప్రతిపక్షాలు ఈ అంశంపై ఒత్తిడి పెంచుతుండగా, ఇప్పుడు మిత్రపక్షాలు కూడా ఇదే డిమాండ్ను తెరపైకి తెచ్చాయి.
ఎల్జేపీ (రామ్విలాస్) అధినేత, కేంద్ర మంత్రి చిరాగ్ పాశ్వాన్ ఈ విషయంపై స్పందించారు. ఎన్నికల ప్రక్రియపై ప్రజల్లో ఎలాంటి అపోహలు, అనుమానాలు లేకుండా ఈసీ వివరణ ఇవ్వాలని ఆయన కోరారు. ఎన్నికల వ్యవస్థపై ప్రజలకు ఉన్న నమ్మకం తగ్గడం ప్రజాస్వామ్యానికి మంచిది కాదని ఆయన అభిప్రాయపడ్డారు.
మరోవైపు ఆర్ఎల్ఎం చీఫ్ ఉపేంద్ర కుశ్వాహా కూడా ఇదే డిమాండ్ను పునరుద్ఘాటించారు. ఎస్ఐఆర్ ప్రక్రియలో నెలకొన్న గందరగోళంపై ఈసీ వెంటనే స్పందించాలని ఆయన ఎక్స్ (ట్విట్టర్) వేదికగా కోరారు.
ఆంధ్రప్రదేశ్లో ఎస్ఐఆర్ ప్రక్రియ విజయవంతంగా ముగిసిందని టీడీపీ ఎంపీ లావు శ్రీకృష్ణదేవరాయలు తెలిపారు. అయితే, ఎక్కడైనా సందేహాలు తలెత్తినప్పుడు ఈసీ పారదర్శకత పాటించడం అవసరమని ఆయన పేర్కొన్నారు. ఇలాంటి వివరణలు ఎన్నికల సంస్థపై ప్రజల విశ్వాసాన్ని మరింత పెంచుతాయని ఆయన అభిప్రాయపడ్డారు.
