నీలగిరిలో ప్రభుత్వం నిర్మించిన 576 డబుల్ బెడ్రూమ్ ఇండ్ల పంపిణీలో అధికార పార్టీకి చెందిన కొందరు నేతలు చేతివాటం ప్రదర్శించారు. సుమారు 150 మంది లబ్ధిదారుల నుంచి ఒక్కొక్కరి వద్ద రూ.3 లక్షల వరకు వసూలు చేశారని ఆరోపణలు వెల్లువెత్తాయి.
తెలంగాణ తొలి ముఖ్యమంత్రి కేసీఆర్ హయాంలో ప్రారంభమైన ఈ ఇండ్ల నిర్మాణాన్ని, ప్రస్తుత అధికార పార్టీ నాయకులు పూర్తి చేశారు. అయితే, గత నవంబర్లో అధికారులు చేపట్టిన రీ-సర్వేలో, గతంలో ఎంపిక చేసిన 421 మందిలో 30 మందిని తొలగించి, మరో 131 మంది పేర్లను మార్చి తమకు అనుకూలమైన వారిని జాబితాలో చేర్చారు.
ఈ అక్రమాలపై డబుల్ బెడ్రూమ్ ఇండ్ల సాధన కమిటీ పేరుతో ఆందోళనలు చేస్తున్న సీపీఎం నేతలు, పంపిణీ కార్యక్రమం వద్ద నిరసన తెలుపుతారని పోలీసులు భావించారు. దీంతో స్వాతంత్య్ర దినోత్సవం రోజున ఏకంగా పార్టీ కార్యాలయంలోకి ప్రవేశించి, సీపీఎం నేతలను ముందస్తుగా అరెస్ట్ చేశారు.
2017లో ప్రారంభమైన ఈ ప్రాజెక్టు కోసం 20 వేలకు పైగా దరఖాస్తులు రాగా, అధికారులు 552 మందిని ఎంపిక చేశారు. కాంగ్రెస్ ప్రభుత్వం అధికారంలోకి వచ్చాక ఈ పంపిణీని పక్కన పెట్టడంతో, సీపీఎం మరియు బీఆర్ఎస్ నేతలు పలుమార్లు ఆందోళనలు నిర్వహించారు.
