నిద్ర లేవగానే చాలామంది తెలియకుండానే ఫోన్ వైపు చెయ్యి చాచుతున్నారు. అలారం ఆపడం కోసం ఫోన్ చేతిలోకి తీసుకున్నప్పటికీ, ఆ తర్వాత సోషల్ మీడియాలో మునిగిపోతున్నారు. ఇలా చేయడం వల్ల రోజు ప్రారంభం కాకముందే మనస్సు రకరకాల ఆలోచనలతో నిండిపోయి తీవ్రమైన ఒత్తిడికి గురవుతోందని నిపుణులు చెబుతున్నారు.
ఉదయాన్నే ఫోన్కు మొదటి ప్రాధాన్యత ఇవ్వడం వల్ల, ఆ రోజంతా ప్రతికూల ఆలోచనలు, బలహీనమైన మానసిక స్థితితో గడపాల్సి వస్తుందని వారు పేర్కొంటున్నారు. మంచం దిగకముందే ఫోన్ చూడటం వల్ల మన మానసిక శక్తి తగ్గిపోతుంది. దీనివల్ల రోజంతా ఏ పనిని కూడా సరిగ్గా చేయలేమని పరిశోధకులు చెబుతున్నారు.
నిద్ర లేవగానే వచ్చే సందేశాలు, ఈ-మెయిల్స్, సోషల్ మీడియా అప్డేట్లను చూడటం వల్ల శరీరంలో 'కార్టిసాల్' (ఒత్తిడిని పెంచే హార్మోన్) స్థాయిలు పెరుగుతాయి. ఫోన్ చూడటం వల్ల కలిగే ఈ ప్రభావం వల్ల మనిషి మానసిక స్థితి దెబ్బతింటుంది.
ఈ అలవాటును మార్చుకోవడానికి ఉదయం నిద్ర లేచిన తర్వాత కేవలం 20 నిమిషాలు కేటాయించాలని నిపుణులు సూచిస్తున్నారు. ఫోన్ చూసే ముందు నీళ్లు తాగడం, ఒళ్లు విరుచుకోవడం (బాడీ స్ట్రెచింగ్), ఆ రోజు పనులను ప్రణాళికాబద్ధంగా చేసుకోవడం వంటివి చేయాలని వారు చెబుతున్నారు.
మొబైల్పై ఆధారపడే అలవాటును తగ్గించుకోవడానికి ఫోన్కు బదులుగా అలారం గడియారాన్ని ఉపయోగించడం మంచిదని నిపుణులు సూచిస్తున్నారు. ఇలా చేయడం వల్ల క్రమంగా ఫోన్ చూసే అలవాటు తగ్గుతుందని వారు పేర్కొంటున్నారు.
