ఆగస్టు 14న ప్రేక్షకుల ముందుకు వచ్చిన ‘విశ్వనాథ్ & సన్స్’ సినిమాకు ఊహించిన దానికంటే మంచి స్పందన లభిస్తోంది. ఈ చిత్రంలో సూర్య సరసన మమితా బైజు కథానాయికగా నటించారు. సూర్యదేవర నాగవంశీ, సాయి సౌజన్య సంయుక్తంగా ఈ చిత్రాన్ని నిర్మించారు.
ఈ కథను 2022లోనే సిద్ధం చేసుకున్నానని దర్శకుడు వెంకీ అట్లూరి తెలిపారు. 40 ఏళ్లు వచ్చినా పెళ్లి చేసుకోని వ్యక్తికి ఉండే బలమైన కారణం, వయసు వ్యత్యాసం ఉన్న బంధం నేపథ్యంలో ఈ సినిమాను రూపొందించారు. మనుషులు చెడ్డవారు కాదని, పరిస్థితులే వారిని మారుస్తాయనే అంశాన్ని ప్రధానంగా తీసుకున్నట్లు ఆయన చెప్పారు.
సూర్యకు కథ మొదటిసారి విన్నప్పుడే బాగా నచ్చింది. బలవంతపు కమర్షియల్ అంశాలు, అనవసరపు కామెడీ లేకుండా సహజత్వంతో సినిమా తీయాలని ఆయన సూచించారు. సూర్య ప్రాజెక్టులోకి వచ్చాక ఆయన బాడీ లాంగ్వేజ్కు తగ్గట్టుగా కొన్ని మార్పులు చేశారు.
సినిమా విడుదలకు ముందే చూసిన సూర్య, తాను కథ విన్నప్పుడు ఏం నమ్మారో తెరపై అదే చూశానని సంతృప్తి వ్యక్తం చేశారు. సాధారణంగా సితార బ్యానర్ సినిమాలను చూశాక త్రివిక్రమ్ గారు కొన్ని మార్పులు సూచిస్తుంటారు. కానీ ఈ సినిమా చూశాక ఆయన ఎలాంటి మార్పులు చెప్పకుండా, సినిమా చాలా బాగుందని ప్రశంసించారు.
మమితా బైజుకు తమిళ భాషపై మంచి పట్టు ఉండటం ఈ పాత్రకు కలిసొచ్చింది. వినోదాత్మక సన్నివేశాల్లో సరైన టైమింగ్ రావాలంటే భాషపై అవగాహన ఉండాలని, ఆమె తన నటనతో పాత్రకు పూర్తి న్యాయం చేశారని వెంకీ అట్లూరి పేర్కొన్నారు. మణిరత్నం, త్రివిక్రమ్ సినిమాల ప్రభావం తనపై బలంగా ఉందని ఆయన చెప్పారు.
సినిమా ఇంత పెద్ద విజయం సాధించడం ఎంతో సంతోషాన్నిచ్చిందని దర్శకుడు తెలిపారు. సంభాషణల ద్వారానే జీవిత సత్యాలు చెప్పే త్రివిక్రమ్ శైలి రచన తనపై ప్రభావం చూపిందని ఆయన గుర్తు చేసుకున్నారు.
