గుంటూరులో కాపు జేఏసీ ఆధ్వర్యంలో నిర్వహించిన ముద్రగడ పద్మనాభం సంతాప సభలో టీడీపీ ఎమ్మెల్యే, ప్రభుత్వ విప్ బొండా ఉమామహేశ్వరరావు పాల్గొన్నారు. ఈ కార్యక్రమంలో ఆయన వైఎస్సార్సీపీ నేత అంబటి రాంబాబుతో వేదిక పంచుకోవడమే కాకుండా, ఆలింగనం చేసుకుని ఆప్యాయంగా మాట్లాడుకోవడం రాజకీయంగా చర్చకు దారితీసింది. కాపు సామాజిక వర్గానికి జనాభా నిష్పత్తి మేరకు నిధులు, పదవులు దక్కాలని, 2019 ఎన్నికల్లో టీడీపీ ఓటమికి కాపు ఉద్యమ ప్రభావమే కారణమని ఉమా చేసిన వ్యాఖ్యలు వివాదాస్పదమయ్యాయి.
వైఎస్సార్సీపీ నేతలతో కలిసి వేదికలు పంచుకోవద్దని పార్టీ నాయకులకు చంద్రబాబు గతంలోనే స్పష్టమైన ఆదేశాలు జారీ చేశారు. ఈ నేపథ్యంలో, బొండా ఉమా వ్యవహారశైలిపై టీడీపీ అధిష్ఠానం తీవ్ర అసంతృప్తి వ్యక్తం చేసింది. ఈ ఘటనపై పూర్తి నివేదిక సేకరించి, ఉమా నుంచి వివరణ తీసుకోవాలని పార్టీ రాష్ట్ర అధ్యక్షుడు పల్లా శ్రీనివాసరావు, మంత్రి నిమ్మల రామానాయుడిని చంద్రబాబు ఆదేశించారు.
అయితే, తనను మాత్రమే లక్ష్యంగా చేసుకుని వివరణ కోరడంపై బొండా ఉమా అసంతృప్తి వ్యక్తం చేసినట్లు సమాచారం. రాజమండ్రిలో జరిగిన ముద్రగడ సంస్మరణ సభలో టీడీపీ నేతలు జ్యోతుల నెహ్రూ, వంగవీటి రాధా కూడా వైఎస్సార్సీపీ నేతలతో కలిసి పాల్గొన్నారని ఆయన గుర్తు చేస్తున్నారు. అన్ని జిల్లాల్లో ఈ సభలు రాజకీయాలకు అతీతంగా జరిగాయని, అంబటి రాంబాబు సభకు వస్తే తన బాధ్యత ఏముంటుందని ఆయన ప్రశ్నిస్తున్నారు. ఈ అంశంపై చంద్రబాబును కలిసి తన వాదనను వినిపించేందుకు ఉమా సిద్ధమవుతున్నారు.
బొండా ఉమా ఇచ్చే వివరణను బట్టి పార్టీ తదుపరి చర్యలు ఉంటాయని రాజకీయ వర్గాల్లో చర్చ జరుగుతోంది. విజయవాడలో త్వరలో ముద్రగడ పద్మనాభం విగ్రహాన్ని ఏర్పాటు చేస్తామని ఉమా ప్రకటించిన నేపథ్యంలో, పార్టీ అధిష్ఠానం దీనిని ఎలా పరిగణనలోకి తీసుకుంటుందనేది ఆసక్తికరంగా మారింది.
