గుజరాత్లోని మోర్బీ జిల్లాలో ఉన్న ఒక చేదబావిలో నీరు అకస్మాత్తుగా అలల మాదిరిగా ఎగిసిపడుతుండటం స్థానికంగా చర్చనీయాంశమైంది. ఈ వింత దృశ్యాన్ని చూసేందుకు చుట్టుపక్కల ప్రాంతాల నుండి ప్రజలు పెద్ద సంఖ్యలో తరలివచ్చారు. బావిలో నీటి కదలికలను గమనించిన గ్రామస్థులు, ఇది భూకంపానికి సంకేతమేమోనని భయాందోళనలకు గురయ్యారు.
ఈ ఘటనపై స్పందించిన జిల్లా యంత్రాంగం, గాంధీనగర్లోని ఇన్స్టిట్యూట్ ఆఫ్ సిస్మోలాజికల్ రీసెర్చ్ (ISR) నిపుణులను రంగంలోకి దించింది. మోర్బీ ప్రాంతంలో భూకంపం వచ్చే అవకాశం లేదని, ఎలాంటి భూకంప సంకేతాలు నమోదు కాలేదని పరిశోధకులు స్పష్టం చేశారు. ఇది భూకంపానికి సంబంధించిన ప్రక్రియ కాదని, ప్రకృతిలో సహజంగా జరిగే ఒక శాస్త్రీయ దృగ్విషయమని వారు వివరించారు.
ఈ ప్రాంతంలో ఇటీవల కురిసిన భారీ వర్షాల వల్ల భూగర్భ జలాలు వేగంగా రీఛార్జ్ అయ్యాయి. భూగర్భంలో నీరు అధికంగా చేరడంతో, రాతి పొరల మధ్య చిక్కుకున్న గాలిపై తీవ్ర ఒత్తిడి పెరిగింది. ఆ గాలి బయటకు వచ్చే క్రమంలో నీటిని పైకి తోయడం వల్ల బావిలో నీరు అలజడి సృష్టిస్తూ ఎగిసిపడుతోందని నిపుణులు గుర్తించారు.
నిపుణుల బృందం క్షేత్రస్థాయిలో పరిశీలన జరిపి, ఇది కేవలం గాలి ఒత్తిడి వల్ల జరుగుతున్న సహజ ప్రక్రియ మాత్రమేనని ధృవీకరించడంతో గ్రామస్థులు ఊపిరి పీల్చుకున్నారు. ప్రజలు ఎలాంటి పుకార్లను లేదా మూఢనమ్మకాలను నమ్మవద్దని మోర్బీ జిల్లా యంత్రాంగం విజ్ఞప్తి చేసింది.
