మిస్బా అర్షద్ మిస్ యూనివర్స్ పాకిస్థాన్ కిరీటాన్ని గెలుచుకున్నట్లు ఆ సంస్థ ఇన్స్టాగ్రామ్ వేదికగా ప్రకటించింది. హుందాతనం, అందం, ఆత్మవిశ్వాసం మరియు స్పష్టమైన లక్ష్యంతో ప్రపంచ వేదికపై పాకిస్థాన్కు ప్రాతినిధ్యం వహించే గౌరవాన్ని ఆమె దక్కించుకున్నారని సంస్థ పేర్కొంది.
ఈ ఏడాది నవంబర్ 24న ప్యూర్టోరికోలోని శాన్జువాన్లో 75వ మిస్ యూనివర్స్ పోటీలు జరగనున్నాయి. ఈ అంతర్జాతీయ వేదికపై పాకిస్థాన్ తరపున మిస్బా అధికారికంగా పోటీ పడనున్నారు. ఈ గెలుపుతో తన అందాల పోటీ ప్రయాణం అధికారికంగా మొదలైందని మిస్బా సోషల్ మీడియాలో పంచుకున్నారు.
ఓటమి అనేది మనం విజేతలం కాదా అని నిర్ణయించదని, నిరంతర కృషి మరియు ప్రతి అడుగులో మెరుగుపడటమే మనల్ని విజేతగా నిలుపుతాయని ఆమె అభిప్రాయపడ్డారు. ఫైనల్ పోటీలో తాను ధరించిన తెల్లటి గౌను ఆశకు ప్రతిక అని, అది కలలను నమ్మడం మానేయకూడదని గుర్తుచేస్తుందని ఆమె వివరించారు. ఈ గౌనుపై ఉన్న రాయల్ బ్లూ రంగు స్పటికాలు మనం నేర్చుకునే విద్యకు చిహ్నాలని ఆమె తెలిపారు.
వియత్నాంకు చెందిన డిజైనర్ గుయెన్ టియెన్ ట్రూయెన్ ఈ గౌనును రూపొందించారు. పాకిస్థాన్ సంప్రదాయ మూలాంశాలను (డిజైన్ నమూనాలను) జోడించి ఆయన దీనిని ప్రత్యేకంగా డిజైన్ చేశారు. విద్య ద్వారానే బాలికలకు సాధికారత కల్పించగలమని మిస్బా బలంగా నమ్ముతారు.
సైకాలజీ చదువుతున్న మిస్బా, మోడలింగ్తో పాటు ఫ్యాషన్, బ్యూటీ రంగాల్లో కంటెంట్ క్రియేటర్గా పనిచేస్తున్నారు. కొత్త సంస్కృతులను అన్వేషించడం, స్థానిక వంటకాలను రుచి చూడటం ఆమెకు ఇష్టం. గతంలో జపాన్లో జరిగిన మిస్ ఇంటర్నేషనల్ 2023 పోటీల్లో కూడా ఆమె పాకిస్థాన్ తరపున పాల్గొన్నారు.
