మిక్సర్ గ్రైండర్ ఎక్కువ కాలం పనిచేయాలంటే దాని సామర్థ్యానికి అనుగుణంగా వాడటం చాలా ముఖ్యం. జార్ను అవసరానికి మించి నింపడం, ఎక్కువ సేపు నిరంతరంగా నడపడం, సరైన జార్ను ఎంచుకోకపోవడం వంటి తప్పులు మోటార్పై ఒత్తిడిని పెంచుతాయి. తయారీదారుల సూచనల ప్రకారం, ఇలాంటి నిర్లక్ష్యం వల్ల మిక్సర్ పాడయ్యే అవకాశం ఉంది.
మసాలాలు లేదా పప్పులు రుబ్బేటప్పుడు మిక్సర్ను వరుసగా ఎక్కువ సేపు నడపడం మంచిది కాదు. దీనివల్ల మోటార్ వేడెక్కి లోడ్ పెరుగుతుంది. కొన్ని మోడళ్లలో ఉండే ఓవర్లోడ్ ప్రొటెక్టర్ (మోటార్పై భారం పెరిగినప్పుడు ఆటోమేటిక్గా విద్యుత్ సరఫరాను ఆపే పరికరం) పనిచేసి మిక్సర్ను ఆపేస్తుంది. అలా జరిగినప్పుడు వెంటనే మళ్లీ ఆన్ చేయకుండా, ప్లగ్ తీసి మోటార్ చల్లబడే వరకు వేచి ఉండాలి.
జార్ను పూర్తిగా నింపడం మరో సాధారణ తప్పు. గట్టి పదార్థాలను రుబ్బేటప్పుడు జార్పై ఉండే MAX మార్కును మించకూడదు. మెరుగైన ఫలితాల కోసం జార్ సామర్థ్యంలో సుమారు 50 శాతం వరకు మాత్రమే పదార్థాలను నింపాలని కొన్ని కంపెనీలు సూచిస్తున్నాయి. అలాగే, వేడి పదార్థాలను రుబ్బే ముందు మీ మిక్సర్ మాన్యువల్లో ఉన్న సూచనలను పరిశీలించడం అవసరం.
ప్రతి పనికి ఒక ప్రత్యేక జార్ ఉంటుంది. చట్నీలు, తడి పదార్థాలు, పొడి మసాలాల కోసం తయారీదారులు సూచించిన జార్ను, బ్లేడ్నే ఉపయోగించాలి. జార్ను బేస్పై పెట్టిన తర్వాత అది సరిగ్గా లాక్ అయిందో లేదో చూసుకోవాలి. కొన్ని మిక్సర్లలో సేఫ్టీ లాక్ (జార్ సరిగ్గా అమర్చకపోతే మోటార్ స్టార్ట్ అవ్వకుండా చేసే భద్రతా వ్యవస్థ) ఉంటుంది, కాబట్టి బలవంతంగా ఆన్ చేయడానికి ప్రయత్నించకూడదు.
జార్తో పాటు మూత, గాస్కెట్ (లీకేజీ కాకుండా ఉండే రబ్బరు రింగ్), బ్లేడ్ అసెంబ్లీని కూడా జాగ్రత్తగా చూసుకోవాలి. గాస్కెట్ దెబ్బతింటే పదార్థాలు లీక్ అయ్యే ప్రమాదం ఉంది. మిక్సర్ నుండి అసాధారణ శబ్దం, పొగ వాసన లేదా స్పార్కింగ్ వంటివి వస్తే, స్వయంగా రిపేర్ చేయడానికి ప్రయత్నించకుండా సర్వీస్ సెంటర్ను సంప్రదించడం మంచిది.