నస్పూర్ పట్టణంలోని గాయత్రినగర్లో నివసించే బోడకుంటి ప్రభాకర్ తన ఇంటి ఆవరణలో గంజాయి మొక్కలను సాగు చేస్తున్నట్లు పోలీసులకు సమాచారం అందింది. దీనితో నార్కోటిక్స్, టాస్క్ఫోర్స్ ఎస్ఐ లచ్చన్న నేతృత్వంలోని బృందం, నస్పూర్ టౌన్ పోలీసులతో కలిసి గురువారం ఆ ఇంటిపై దాడులు నిర్వహించింది.
తనిఖీల్లో భాగంగా ఇంటి పెరట్లో రెండు గంజాయి మొక్కలు పెరుగుతున్నట్లు పోలీసులు గుర్తించారు. సుమారు రెండు మీటర్ల ఎత్తు ఉన్న ఈ మొక్కల విలువ సుమారు రూ. 20 వేలు ఉంటుందని అధికారులు అంచనా వేశారు.
స్వాధీనం చేసుకున్న మొక్కలతో పాటు నిందితుడిని నస్పూర్ పోలీసులకు అప్పగించారు. ఈ ఘటనపై కేసు నమోదు చేసి దర్యాప్తు చేస్తున్నామని, మాదకద్రవ్యాల సాగు, విక్రయాలపై కఠిన చర్యలు తీసుకుంటామని ఎస్ఐ లచ్చన్న తెలిపారు.
మాదకద్రవ్యాలకు సంబంధించిన సమాచారం ఇచ్చేవారి వివరాలను గోప్యంగా ఉంచుతామని పోలీసులు స్పష్టం చేశారు. నిందితుడిపై తదుపరి చట్టపరమైన చర్యలు కొనసాగుతున్నాయి.
