కర్నూలు జిల్లావ్యాప్తంగా ఏర్పాటు చేసిన ఏడు కేంద్రాల్లో నీట్–పీజీ 2026 ఆన్లైన్ పరీక్ష ఆదివారం జరిగింది. కట్టుదిట్టమైన భద్రతా ఏర్పాట్ల మధ్య పరీక్ష సజావుగా సాగింది. మొత్తం 2,114 మంది అభ్యర్థులు దరఖాస్తు చేసుకోగా, వారిలో 2,087 మంది హాజరయ్యారు. 27 మంది అభ్యర్థులు పరీక్షకు గైర్హాజరైనట్లు అధికారులు వెల్లడించారు.
పరీక్షా నిర్వహణను జిల్లా కలెక్టర్ డా. ఏ. సిరి స్వయంగా పర్యవేక్షించారు. పుల్లారెడ్డి ఇంజినీరింగ్ కళాశాల, కె.వి.సుబ్బారెడ్డి ఇంజినీరింగ్ కళాశాలల్లోని కేంద్రాలను ఆమె పరిశీలించారు. అభ్యర్థుల హాల్టికెట్ల తనిఖీతో పాటు, నిబంధనల అమలును కలెక్టర్ స్వయంగా తనిఖీ చేశారు.
పరీక్షా కేంద్రాల్లో విద్యార్థులకు ఎటువంటి ఇబ్బందులు కలగకుండా తాగునీరు, వైద్య సదుపాయాలు మరియు నిరంతర విద్యుత్ సరఫరాను అధికారులు అందుబాటులో ఉంచారు. ఎటువంటి అవకతవకలకు తావులేకుండా పారదర్శకంగా పరీక్షను నిర్వహించినట్లు కలెక్టర్ తెలిపారు. ఈ కార్యక్రమంలో నగరపాలక సంస్థ కమిషనర్ చల్లా ఓబులేసు, కల్లూరు తహసీల్దార్ ఆంజనేయులు తదితరులు పాల్గొన్నారు.
