కేరళలోని నిలంబూరులో శుక్రవారం జరిగిన కార్యక్రమంలో ఏఐసీసీ (అఖిల భారత కాంగ్రెస్ కమిటీ) ప్రధాన కార్యదర్శి, ఎంపీ కే.సీ. వేణుగోపాల్ చేతుల మీదుగా సీఎం రేవంత్ రెడ్డి ఈ అవార్డును స్వీకరించారు. ఆర్యదాన్ ముహమ్మద్ ఫౌండేషన్ ఆధ్వర్యంలో ఈ పురస్కారాన్ని ఏర్పాటు చేశారు. రైతులకు, వెనుకబడిన వర్గాలకు, సామాన్య ప్రజలకు తెలంగాణ ప్రభుత్వం అందిస్తున్న సంక్షేమ పథకాలు, రేవంత్ రెడ్డి నాయకత్వ ప్రతిభను గుర్తించి ఈ అవార్డుకు ఎంపిక చేసినట్లు ఫౌండేషన్ వర్కింగ్ చైర్మన్, ఎమ్మెల్యే ఆర్యదాన్ షౌకత్ తెలిపారు. ఈ పురస్కారంలో భాగంగా లక్ష రూపాయల నగదు, ప్రశంసాపత్రం, జ్ఞాపికను సీఎంకు అందజేశారు.
అవార్డు అందుకున్న అనంతరం రేవంత్ రెడ్డి మాట్లాడుతూ, దేశంలో ప్రస్తుతం సంఘ్ పరివార్, గాంధీ పరివార్ అనే రెండు వర్గాల మధ్య పోరాటం జరుగుతోందని అభిప్రాయపడ్డారు. మతం, భాష, కులం, సంస్కృతి పేరిట సంఘ్ పరివార్ దేశాన్ని విడగొడుతోందని, గాంధీ పరివార్ దేశ ఐక్యత కోసం పోరాడుతోందని ఆయన పేర్కొన్నారు. మహాత్మా గాంధీ, ఇందిరా గాంధీ, రాజీవ్ గాంధీ దేశం కోసం ప్రాణత్యాగం చేశారని, సోనియా గాంధీ, రాహుల్ గాంధీ, ప్రియాంక గాంధీ పదవులను త్యాగం చేశారని ఆయన గుర్తు చేశారు. సంఘ్ పరివార్ను ఓడించి దేశాన్ని రక్షించే క్రమంలో తన ప్రాణాలను త్యాగం చేయడానికి కూడా సిద్ధమని రేవంత్ స్పష్టం చేశారు.
దేశ రాజకీయాలను అర్థం చేసుకోవడానికి కేరళను ఒక సంకేతంగా చూడాలని సీఎం పిలుపునిచ్చారు. రుతుపవనాల కోసం వాతావరణ నిపుణులు కేరళ వైపు చూసినట్లే, దేశ రాజకీయ గమనాన్ని కూడా కేరళ రాజకీయాలు ప్రభావితం చేస్తాయని ఆయన అన్నారు. 2026లో కేరళలో కాంగ్రెస్ పార్టీ సాధించే విజయం దేశవ్యాప్తంగా ఒక రాజకీయ తుపానుగా మారాలని ఆయన ఆకాంక్షించారు. రాహుల్ గాంధీని భారత ప్రధానమంత్రిగా చూడటమే తన ముందున్న ఏకైక లక్ష్యమని, తనకు వ్యక్తిగత రాజకీయ ఆశలు లేవని ఆయన స్పష్టం చేశారు.
ఓటు హక్కును, ప్రజాస్వామ్యాన్ని, లౌకికవాదాన్ని కాపాడాల్సిన బాధ్యత అందరిపై ఉందని రేవంత్ రెడ్డి అన్నారు. మతతత్వ శక్తుల నుంచి దేశాన్ని రక్షించుకోవాలని ఆయన ప్రజలకు పిలుపునిచ్చారు. కాంగ్రెస్ కార్యకర్తగా, రాహుల్ గాంధీ నాయకత్వంలోని బృందంలో ఒక సభ్యుడిగా ఈ పురస్కారాన్ని స్వీకరించడం ఎంతో గౌరవంగా భావిస్తున్నానని ఆయన తన ప్రసంగంలో పేర్కొన్నారు.
