కరీంనగర్లో పేరుకుపోయిన చెత్త సమస్యకు శాశ్వత పరిష్కారం చూపేందుకు అధికారులు సాలిడ్ వేస్ట్ మేనేజ్మెంట్ యూనిట్ను ఏర్పాటు చేయనున్నారు. నగరంలో సేకరించిన చెత్తను శాస్త్రీయంగా వేరు చేసి, రీసైకిల్ చేసేందుకు రూ.80 కోట్ల వ్యయంతో ఈ ప్రాజెక్టును చేపట్టబోతున్నారు. ఈ మేరకు ప్రతిపాదనలను కేంద్ర ప్రభుత్వానికి పంపినట్లు కేంద్ర మంత్రి బండి సంజయ్ కుమార్ వెల్లడించారు.
ఈ ప్రతిపాదనలపై చర్చించేందుకు కరీంనగర్ ఆర్ అండ్ బీ గెస్ట్ హౌస్లో మేయర్ కొలగాని శ్రీనివాస్, డిప్యూటీ మేయర్ సునీల్ రావు, మున్సిపల్ కమిషనర్ మరియు ఇతర అధికారులతో బండి సంజయ్ బుధవారం భేటీ అయ్యారు. మొత్తం రూ.840 కోట్ల అర్బన్ ఛాలెంజ్ ఫండ్ (UCF) నిధులతో చేపట్టాల్సిన వివిధ అభివృద్ధి పనుల ప్రణాళికలను ఆయన పరిశీలించారు.
నగరంలో 50 కిలోమీటర్ల మేర 40 అడుగుల కంటే ఎక్కువ వెడల్పు ఉన్న మోడల్ రోడ్లను రూ.630 కోట్లతో నిర్మించాలని అధికారులు నిర్ణయించారు. వీటితో పాటు జిల్లా కోర్టు, సివిల్ ఆస్పత్రి, గీతాభవన్ వద్ద ఫుట్ ఓవర్ బ్రిడ్జిలు, బస్ స్టేషన్ వద్ద హైదరాబాద్ ఉప్పల్ తరహాలో స్కై వాక్ నిర్మించేందుకు డిజైన్లు సిద్ధం చేశారు. ట్రాఫిక్ జంక్షన్ల అభివృద్ధి, 130 ఎలక్ట్రిక్ వాహనాల కొనుగోలు కూడా ఈ ప్రణాళికలో భాగమే.
వర్షం పడినప్పుడు రోడ్లపై నీరు నిలిచి ప్రజలు పడుతున్న ఇబ్బందులను తొలగించేందుకు 80 కిలోమీటర్ల పొడవునా వర్షపు నీటి కాల్వలను నిర్మించనున్నారు. ఈ ప్రతిపాదనలపై సంతృప్తి వ్యక్తం చేసిన బండి సంజయ్, కేంద్ర పట్టణాభివృద్ధి శాఖ మంత్రి మనోహర్ లాల్ కట్టర్, రాష్ట్ర మున్సిపల్ శాఖ ముఖ్య కార్యదర్శి శ్రీదేవి, ఈఎన్ సీ అధికారులతో ఫోన్ ద్వారా మాట్లాడారు.
ఈ అభివృద్ధి పనులకు యుద్ధ ప్రాతిపదికన సాంకేతిక అనుమతులు మంజూరు చేయాలని ఆయన కోరారు. అనుమతులు రాగానే టెండర్ ప్రక్రియ పూర్తి చేసి పనులు ప్రారంభించాలని మున్సిపల్ కమిషనర్ను ఆదేశించారు. ఈ నిధులతో కరీంనగర్ నగర రూపురేఖలు పూర్తిగా మారిపోతాయని ఆయన ఆశాభావం వ్యక్తం చేశారు.
