నెమలిపురి గ్రామానికి చెందిన సపావట్ రవి, అతడి అన్న ఇస్రాకు మధ్య తమ చేనుకు వెళ్లే దారి విషయంలో చాలా కాలంగా వివాదం నడుస్తోంది. గతంలో గ్రామ పెద్దల సమక్షంలో ఈ సమస్యపై పంచాయితీ జరిగి, ఇద్దరి మధ్య రాజీ కూడా కుదిరింది.
అయితే, ఇస్రా మళ్లీ ఆ దారిని దున్నడంతో రవి అతడిని ప్రశ్నించాడు. ఈ విషయాన్ని రవి గ్రామ పెద్దల దృష్టికి తీసుకెళ్లగా, వారు ఇస్రాను పిలిచి మందలించారు.
దీంతో ఆగ్రహించిన ఇస్రా, తన కుటుంబ సభ్యులైన గుణశేఖర్, పూజిత, లచ్చుతో కలిసి రవిపై దాడికి దిగాడు. వీరు కత్తులు, గొడ్డలి, ఇనుపరాడ్డు, కర్రలతో రవి, అతడి భార్య శైలజపై ముకుమ్మడిగా దాడి చేశారు.
ఈ దాడిలో రవి తల పగిలి తీవ్ర గాయాలయ్యాయి. స్థానికులు పోలీసులకు సమాచారం అందించడంతో, వారు వెంటనే ఘటనా స్థలానికి చేరుకున్నారు.
పోలీసులు గాయపడిన రవి, శైలజను చికిత్స కోసం ఆస్పత్రికి తరలించారు. తనపై హత్యాయత్నం చేసిన వారిపై చర్యలు తీసుకోవాలని రవి పోలీసులకు ఫిర్యాదు చేశాడు.
