రాబోయే 2027 జాతీయ జనగణనలో బీసీ (వెనుకబడిన తరగతులు), ఓబీసీ (ఇతర వెనుకబడిన తరగతులు) కులగణన చేపట్టాలని కేంద్రాన్ని కోరుతూ తెలంగాణ శాసనసభ తీర్మానాన్ని ఆమోదించింది. ఈ మేరకు బీసీ సంక్షేమ శాఖ మంత్రి పొన్నం ప్రభాకర్ సభలో తీర్మానాన్ని ప్రవేశపెట్టారు. బీసీల జనాభాపై స్పష్టమైన గణాంకాలు ఉంటేనే వారికి తగిన నిధులు, సంక్షేమ పథకాలు, విద్యా అవకాశాలు కల్పించడం సాధ్యమవుతుందని ఆయన వివరించారు.
ప్రస్తుతం కేంద్రం రూపొందించిన జనగణన ప్రశ్నావళిలో ఎస్సీ, ఎస్టీల వివరాలకు ప్రాధాన్యత ఇస్తున్నప్పటికీ, బీసీల వివరాలను అడగడం లేదని మంత్రి పొన్నం గుర్తు చేశారు. రిజర్వేషన్లను 50 శాతం పరిమితికి మించి పెంచాలంటే శాస్త్రీయమైన కుల గణాంకాలు అత్యంత అవసరమని ఆయన స్పష్టం చేశారు. తెలంగాణ ప్రభుత్వం ఇప్పటికే రాష్ట్రంలో సమగ్ర కుల సర్వేను చేపట్టిందని, ఇది సామాజిక న్యాయానికి పునాది అని మంత్రి వాకిటి శ్రీహరి పేర్కొన్నారు.
ఈ చర్చలో పాల్గొన్న ఉప ముఖ్యమంత్రి మల్లు భట్టి విక్రమార్క, కులగణన అనేది సమాజ శ్రేయస్సుకు సంబంధించిన అంశమని అభివర్ణించారు. సమాజంలో ఉన్న అసమానతలను గుర్తించే ఎక్స్రే వంటిది కులగణన అని ఆయన వ్యాఖ్యానించారు. కులగణన విషయంలో బీజేపీ సభ్యులు తమ వైఖరిని స్పష్టంగా చెప్పాలని ఆయన డిమాండ్ చేశారు.
అయితే, ఈ తీర్మానాన్ని వ్యతిరేకిస్తూ బీజేపీ ఎమ్మెల్యేలు సభ నుంచి వాకౌట్ చేశారు. కామారెడ్డి బీసీ డిక్లరేషన్ అమలు చేయాలని వారు డిమాండ్ చేశారు. బీజేపీ సభ్యుల తీరుపై మంత్రులు పొన్నం ప్రభాకర్, సీతక్క తీవ్ర అసహనం వ్యక్తం చేశారు. బీసీల డిమాండ్ను కేంద్రం గుర్తించి, త్వరలో చేపట్టే జనగణనలో కులగణనను చేర్చాలని ప్రభుత్వం కోరుతోంది.
