జూలై 1 నుంచి ఆగస్టు 25 మధ్య కాలంలో దేశవ్యాప్తంగా 25,184 మంది ప్రజల నుంచి నేరుగా అభిప్రాయాలను సేకరించి ఈ సర్వేను నిర్వహించారు. తాజా అంచనాల ప్రకారం, నేడే ఎన్నికలు జరిగితే బీజేపీ నేతృత్వంలోని ఎన్డీయే (NDA) కూటమికి 326 సీట్లు వస్తాయని సర్వే తెలిపింది.
గత జనవరిలో నిర్వహించిన సర్వేతో పోలిస్తే ఎన్డీయే బలం కొంత తగ్గింది. అప్పట్లో ఎన్డీయేకు 352 సీట్లు వస్తాయని అంచనా వేయగా, తాజా సర్వేలో ఆ సంఖ్య 26 సీట్లు తగ్గి 326కు చేరుకుంది. అయినప్పటికీ, ప్రభుత్వం ఏర్పాటుకు అవసరమైన మ్యాజిక్ ఫిగర్ లేదా మెజారిటీ మార్కును ఎన్డీయే సులభంగా దాటుతుందని సర్వే పేర్కొంది.
మరోవైపు కాంగ్రెస్ నేతృత్వంలోని ఇండియా (INDIA) కూటమి సీట్ల సంఖ్యలో పెద్దగా మార్పు కనిపించలేదు. గత జనవరిలో ఇండియా కూటమికి 182 సీట్లు వస్తాయని అంచనా వేయగా, తాజా సర్వేలో ఆ సంఖ్య 185గా నమోదైంది.
ఓట్ల శాతం విషయానికి వస్తే, బీజేపీకి 39 శాతం ఓట్లు వచ్చే అవకాశం ఉందని సర్వే అంచనా వేసింది. అదే సమయంలో కాంగ్రెస్ పార్టీకి 21 శాతం ఓట్లు లభిస్తాయని సర్వే పేర్కొంది.
మొత్తంగా చూస్తే ఎన్డీయే కూటమికి ప్రజల మద్దతు కొంత మేర తగ్గుతున్నట్లు సర్వే అంచనా వేసింది. అయితే, ప్రస్తుత పరిస్థితుల్లో ఎన్డీయే కూటమి మెరుగైన సీట్లతో మళ్లీ అధికారంలోకి వస్తుందని సర్వే స్పష్టం చేసింది.
