రంగారెడ్డి జిల్లా షాబాద్ మండలంలో జరిగిన ఆరు వరుస హత్యల ఘటనపై ముఖ్యమంత్రి రేవంత్ రెడ్డి నోరు మెదపకపోవడంపై మాజీ మంత్రి, మహేశ్వరం ఎమ్మెల్యే సబితా ఇంద్రారెడ్డి తీవ్ర ఆగ్రహం వ్యక్తం చేశారు. రాష్ట్రంలో నలుగురు ఆడబిడ్డల గొంతులు కోయడంతో ప్రజల్లో భయాందోళనలు నెలకొన్నా, సీఎం కనీసం ఒక్క మాట కూడా మాట్లాడలేదని ఆమె నిలదీశారు.
జూలై 12న షాబాద్ కేంద్రంలో బాధిత కుటుంబాన్ని సబితా ఇంద్రారెడ్డి పరామర్శించారు. ఈ సందర్భంగా కొడంగల్ మాజీ ఎమ్మెల్యే పట్నం నరేందర్ రెడ్డి, షాబాద్ మాజీ జడ్పీటీసీ పట్నం అవినాశ్ రెడ్డి ఆమెకు తోడయ్యారు. బాధితుల కుటుంబంలో మిగిలిన దివ్యాంగురాలైన బాలిక మేఘనతో మాట్లాడిన సబితా, అవినాశ్ రెడ్డి అందించిన రూ. 5 లక్షల చెక్కును ఆమెకు అందజేశారు.
పోలీసులు, ప్రభుత్వం నిర్లక్ష్యం వహించడమే ఈ ఘోరానికి కారణమని సబితా ఆరోపించారు. బాధితులు ఫిర్యాదు చేసినప్పుడే అధికారులు స్పందించి ఉంటే ఇంతమంది ప్రాణాలు పోయేవి కావని, హోం మంత్రిత్వ శాఖ కూడా నిర్వహిస్తున్న సీఎం ఈ విషయంలో బాధ్యత వహించాల్సిందేనని పేర్కొన్నారు. పోక్సో (బాలల లైంగిక నేరాల చట్టం) కేసులు పెరుగుతున్నా సీఎం, పోలీస్ ఉన్నతాధికారులు ఎందుకు సమీక్షించడం లేదని, కమాండ్ కంట్రోల్ రూమ్లో కూర్చొని ఏం చేస్తున్నారని ఆమె మండిపడ్డారు.
ఆడబిడ్డలను కోటీశ్వరులను చేస్తామని గొప్పలు చెప్పుకోవడం కంటే, ముందు వారిని కాపాడే బాధ్యత తీసుకోవాలని సబితా సూచించారు. పక్క రాష్ట్ర ముఖ్యమంత్రి ఈ ఘటనపై స్పందిస్తే, మన సీఎం మాత్రం మీడియా ముందు బీఆర్ఎస్ నేతలపై విమర్శలు గుప్పిస్తున్నారని, కనీసం సంతాపం తెలియజేయకపోవడం దారుణమని విమర్శించారు. బాధిత యువతి పేరిట తక్షణమే రూ. కోటి డిపాజిట్ చేయాలని, జిల్లా కలెక్టర్ ప్రత్యేక చొరవ తీసుకుని ఆమెకు అండగా నిలవాలని డిమాండ్ చేశారు.
నిందితుడిని వెంటనే పట్టుకోవాలని కోరుతూ, ఈ కార్యక్రమంలో డీసీఎంఏస్ చైర్మన్ పట్లోళ్ల కృష్ణారెడ్డి, బీఆర్ఎస్ సీనియర్ నేతలు దేశమళ్ల ఆంజనేయులు, చల్లా శేఖర్ రెడ్డి, జడల రాజేందర్ గౌడ్ తదితరులు పాల్గొన్నారు.
