గాలే వేదికగా జరుగుతున్న తొలి టెస్టులో భారత్ పట్టు బిగించింది. శ్రీలంక రెండో ఇన్నింగ్స్లో 34 ఓవర్లు ముగిసేసరికి 84 పరుగులకు 4 వికెట్లు కోల్పోయింది. భారత్ నిర్దేశించిన 372 పరుగుల లక్ష్యాన్ని అందుకోవాలంటే శ్రీలంక ఇంకా 288 పరుగులు చేయాల్సి ఉంది.
తొలి ఇన్నింగ్స్లో దేవదత్ పడిక్కల్ 167 పరుగులతో రాణించడంతో భారత్ 462 పరుగులు చేసింది. కేఎల్ రాహుల్ 82, ధ్రువ్ జురేల్ 51 పరుగులతో సహకరించారు. శ్రీలంక బౌలర్లలో ప్రభాత్ జయసూర్య 4, కేశర నువంత 3 వికెట్లు పడగొట్టారు. ప్రత్యుత్తరంగా శ్రీలంక తొలి ఇన్నింగ్స్లో 284 పరుగులకే ఆలౌట్ కావడంతో భారత్కు 178 పరుగుల ఆధిక్యం లభించింది.
రెండో ఇన్నింగ్స్లో భారత్ 193 పరుగులకే పరిమితమైంది. రిషభ్ పంత్ 66 పరుగులతో పోరాడగా, శ్రీలంక బౌలర్ అసిత ఫెర్నాండో 4 వికెట్లు తీసి భారత్ను కట్టడి చేశాడు. దీంతో శ్రీలంక ముందు 372 పరుగుల భారీ లక్ష్యం నిలిచింది.
లక్ష్య ఛేదనలో శ్రీలంక ఆరంభంలోనే తడబడింది. నిశాన్ మధుష్క ఫెర్నాండో, పసిండు సూరియబండార, కమిందు మెండిస్, లహిరు ఉదర తక్కువ పరుగులకే పెవిలియన్ చేరారు. భారత బౌలర్ మనవ్ సుతార్ 2 వికెట్లు తీయగా, మహ్మద్ సిరాజ్, ప్రసిధ్ కృష్ణ చెరో వికెట్ పడగొట్టారు.
ప్రస్తుతం కెప్టెన్ ధనంజయ డి సిల్వా, సోనల్ దినూష క్రీజులో ఉండి ఇన్నింగ్స్ను చక్కదిద్దుతున్నారు. ఐదో రోజున భారత బౌలర్లు మిగిలిన ఆరు వికెట్లను త్వరగా తీస్తే విజయం ఖాయం అవుతుంది. అయితే గాలేలో వర్షం కురిస్తే మ్యాచ్ ఫలితంపై ప్రభావం పడే అవకాశం ఉందని భావిస్తున్నారు.
