హైదరాబాద్ నగర శివారులోని విజయవాడ–ముంబై జాతీయ రహదారి (NH-65)పై వైఎన్ఆర్ ఫంక్షన్ హాల్ వద్ద పోలీసులు ప్రత్యేక తనిఖీలు చేపట్టారు. ఈ క్రమంలో మహారాష్ట్ర రిజిస్ట్రేషన్ నంబర్ MH 14 HU 3599 కలిగిన లారీ కంటైనర్ను ఆపి తనిఖీ చేయగా, డ్రైవర్ క్యాబిన్ పైభాగంలో దాచిన 10 సంచులను గుర్తించారు. వీటిలో 237 కిలోల గంజాయి బయటపడటంతో పోలీసులు దానిని స్వాధీనం చేసుకున్నారు.
ఈ ఘటనలో రాజేష్ కుమార్, అనిల్ రంగనాథ్ బిచారేలను పోలీసులు అరెస్టు చేశారు. నిందితుల వద్ద నుంచి మూడు సెల్ఫోన్లను కూడా స్వాధీనం చేసుకున్నట్లు ఈగల్ ఎస్పీ గిరిధర్ వెల్లడించారు. విచారణలో నిందితులు తొలుత విశాఖపట్నం వరకే వెళ్లామని తప్పుదారి పట్టించే ప్రయత్నం చేసినప్పటికీ, మొబైల్ కాల్ డేటా రికార్డులు పరిశీలించాక వారు ఒడిశాలోని గుణ్పూర్కు వెళ్లినట్లు అధికారులు నిర్ధారించారు.
గతంలో ముంబైలో లారీ డ్రైవర్గా పనిచేసిన రాజేష్కు, పూణేకు చెందిన సురేష్ కేదారి, ధరమ్ షిండేలతో పరిచయం ఏర్పడింది. లారీ కొనుగోలు కోసం వారు ఇచ్చిన రూ.3 లక్షల ఆర్థిక సాయానికి ప్రతిఫలంగా, ఒడిశా నుంచి పూణేకు గంజాయిని తరలించేందుకు రాజేష్ అంగీకరించాడు. జూలై 7న రూ.1.50 లక్షలు తీసుకుని, విశాఖపట్నం సమీపంలో పబిత్రా కుమార్ సబర్ నుంచి ఈ గంజాయిని సేకరించినట్లు విచారణలో తేలింది.
ఈ కేసులో ప్రధాన నిందితులుగా ఉన్న సురేష్ కేదారి, ధరమ్ షిండే, పబిత్రా కుమార్ సబర్ ప్రస్తుతం పరారీలో ఉన్నారు. నిందితులందరినీ త్వరలోనే అరెస్టు చేస్తామని ఎస్పీ గిరిధర్ స్పష్టం చేశారు.
