బంగ్లాదేశ్ మాజీ ప్రధాని షేక్ హసీనా ఈ వారం ఢిల్లీలో జరగనున్న ఒక కార్యక్రమంలో పాల్గొననున్నారు. 2024 ఆగస్టు 5న బంగ్లాదేశ్లో విద్యార్థుల ఉద్యమం కారణంగా ప్రభుత్వం కూలిపోయిన తర్వాత, ఆమె భారత్కు చేరుకున్నారు. ప్రస్తుతం 78 ఏళ్ల వయసున్న హసీనా, అప్పటి నుంచి బహిరంగంగా ఎక్కడా కనిపించలేదు. ఈ నేపథ్యంలో, బుధవారం సాయంత్రం 6 గంటల నుంచి 7:30 గంటల వరకు ఫారిన్ కరస్పాండెంట్స్ క్లబ్ ఆఫ్ సౌత్ ఏషియా ఆధ్వర్యంలో సర్ మార్క్ టల్లీ ఆడిటోరియంలో ఈ కార్యక్రమం జరగనుంది.
ఈ కార్యక్రమంలో హసీనా తన స్వదేశానికి తిరిగి వెళ్లే ప్రణాళికలపై స్పష్టత ఇచ్చే అవకాశం ఉందని సమాచారం. ఆమెతో పాటు కుమారుడు సజీబ్ వాజెద్ జాయ్, మాజీ విద్యాశాఖ మంత్రి మొహిబుల్ హసన్ చౌదరి నౌఫెల్ కూడా మాట్లాడనున్నారు. తనపై మరణశిక్ష వంటి కేసులు ఉన్నప్పటికీ, ప్రజల పిలుపు మేరకు స్వదేశానికి వెళ్లాలని నిర్ణయించుకున్నట్లు ఆమె ఇటీవల ఏఎఫ్పీకి ఇచ్చిన ఇంటర్వ్యూలో పేర్కొన్నారు. భారత్ తనకు తగిన గౌరవం ఇస్తోందని, తనపై ఎటువంటి ఒత్తిడి లేదని ఆమె స్పష్టం చేశారు.
మరోవైపు, హసీనా స్వదేశానికి వస్తే వెంటనే అరెస్టు చేస్తామని బంగ్లాదేశ్ న్యాయశాఖ మంత్రి ఎం. అసదుజ్జమాన్ హెచ్చరించారు. ఆమెకు తిరిగి వచ్చే హక్కు ఉన్నప్పటికీ, చట్టం తన పని తాను చేసుకుపోతుందని ఆయన పేర్కొన్నారు. ఆమె పాస్పోర్ట్ రద్దు చేసినప్పటికీ, బంగ్లాదేశ్ భూభాగంలోకి అడుగుపెట్టిన వెంటనే చట్టబద్ధమైన చర్యలు తీసుకుంటామని మంత్రి స్పష్టం చేశారు. 2025 నవంబర్లో అంతర్జాతీయ నేరాల ట్రైబ్యునల్ ఆమెకు గైర్హాజరీలో మరణశిక్ష విధించిన సంగతి తెలిసిందే.
తనపై నమోదైన కేసులను రాజకీయ ఉద్దేశాలతో కూడినవిగా హసీనా కొట్టిపారేశారు. ఏది ఏమైనా, ఈ ఏడాది చివరి నాటికి స్వదేశానికి వెళ్లాలనే ఆమె నిర్ణయం బంగ్లాదేశ్ రాజకీయాల్లో చర్చనీయాంశంగా మారింది. ఈ కార్యక్రమాన్ని క్లబ్ సోషల్ మీడియా వేదికల ద్వారా ప్రత్యక్ష ప్రసారం చేయనున్నారు.
