బ్రిజ్ భూషణ్ శరణ్ సింగ్ ఒక గుండా, క్రిమినల్ అని వినేశ్ ఫొగాట్ అభివర్ణించారు. ఇటీవలే లైంగిక వేధింపుల కేసులో బ్రిజ్ భూషణ్ నిర్దోషిగా తేలడంపై ఆమె తీవ్ర అసహనం వ్యక్తం చేశారు. ఢిల్లీ హైకోర్టు ఇచ్చిన తీర్పును తాను అంగీకరించబోనని, ఈ విషయంలో న్యాయ పోరాటాన్ని సుప్రీంకోర్టులో కొనసాగిస్తానని ఆమె స్పష్టం చేశారు.
హర్యానాలోని జింద్లో జరిగిన కార్యక్రమంలో వినేశ్ ఫొగాట్ మాట్లాడుతూ, బ్రిజ్ భూషణ్ అక్రమంగా ఆస్తులు కూడబెట్టారని ఆరోపించారు. ఆయన ఏళ్ల తరబడి బీజేపీ ఎంపీగా ఉన్నారని, సాధారణ ప్రజలకు దక్కని సంపద ఆయనకు ఎలా వచ్చిందని ఆమె ప్రశ్నించారు. అంతేకాదు, ఆయనపై ఆర్థిక నేరాలను దర్యాప్తు చేసే ఎన్ఫోర్స్మెంట్ డైరెక్టరేట్ (ED), సెంట్రల్ బ్యూరో ఆఫ్ ఇన్వెస్టిగేషన్ (CBI) వంటి సంస్థలు ఎందుకు విచారణ జరపడం లేదని ఆమె నిలదీశారు.
బ్రిజ్ భూషణ్ ప్రయాణించే హెలికాప్టర్ల ఖర్చుపై కూడా వినేశ్ అనుమానాలు వ్యక్తం చేశారు. గోండా ప్రాంతంలో ఆయన వల్ల ఎంతమంది భూములు కోల్పోయారో, ఎంతమంది బాధితులు ఉన్నారో ఆమె గుర్తు చేశారు. అలాంటి వ్యక్తికి మనం ఎందుకు గౌరవం ఇవ్వాలని ఆమె ప్రశ్నించారు.
ఈ వివాదాన్ని ఇక్కడితో వదిలిపెట్టే ప్రసక్తే లేదని వినేశ్ ఫొగాట్ తేల్చి చెప్పారు. తన న్యాయ పోరాటాన్ని సుప్రీంకోర్టులో కొనసాగించడం ద్వారా బ్రిజ్ భూషణ్ను వదిలిపెట్టేది లేదని ఆమె ప్రకటించారు.
