బీజేపీ విధానాలకు వ్యతిరేకంగా తమ పోరాటం కొనసాగుతుందని సమాజ్వాదీ పార్టీ (SP) చీఫ్ అఖిలేశ్ యాదవ్ శనివారం పట్నాలో ప్రకటించారు. ఇతర పార్టీలతో చేసుకున్న పొత్తులకు తమ పార్టీ కట్టుబడి ఉంటుందని, ఇచ్చిన మాటను ఎప్పుడూ గౌరవిస్తామని ఆయన చెప్పారు. బడా వ్యాపార సంస్థలకు ప్రయోజనం చేకూర్చేలా బీజేపీ ప్రభుత్వం వ్యవహరిస్తోందని ఆయన ఆరోపించారు.
వెనుకబడిన వర్గాలు, దళితులు, మైనారిటీల (PDA) సామాజిక న్యాయమే తమ లక్ష్యమని అఖిలేశ్ తెలిపారు. ఈ వర్గాల కోసం తాము రూపొందించిన PDA అజెండాను చూసి అధికార పక్షం భయపడుతోందని, దీనిపై తప్పుడు ప్రచారం చేస్తోందని ఆయన విమర్శించారు. ఈ అజెండాను రంగులు మార్చే ఊసరవెల్లిగా సీఎం యోగి ఆదిత్యనాథ్ అభివర్ణించడంపై ఆయన స్పందించారు.
పెట్రోల్, డీజిల్ ధరలతో పాటు చక్కెర ధరలు పెరగడంపై అఖిలేశ్ ఆందోళన వ్యక్తం చేశారు. చక్కెర ధర ఎందుకు పెరుగుతుందో ప్రభుత్వం వివరణ ఇవ్వాలని ఆయన డిమాండ్ చేశారు. పెట్రోల్లో ఇథనాల్ను కలుపుతూ లాభపడుతున్న బీజేపీ నేతలు, ఇప్పుడు చక్కెర ధరను పెంచి మరింత లాభపడుతున్నారని ఆయన ఆరోపించారు. ఈ సొమ్మంతా ఎవరి జేబులోకి వెళుతోందని ఆయన ప్రశ్నించారు.
రాష్ట్రంలో విద్యా వ్యవస్థ భ్రష్టుపట్టిందని, ప్రభుత్వ ప్రాథమిక పాఠశాలలను ప్రభుత్వం నిర్లక్ష్యం చేస్తోందని అఖిలేశ్ దుయ్యబట్టారు. ఈ పాఠశాలల్లో అణగారిన వర్గాల పిల్లలే ఎక్కువగా చదువుకుంటున్నారని ఆయన గుర్తుచేశారు. జర్నలిస్టులపై బీజేపీ ప్రభుత్వం ఒత్తిడి పెంచుతోందని, నిజం చెప్పే వారిపై దాడులు జరుగుతున్నాయని ఆయన ఆరోపించారు.
కుటుంబ రాజకీయాలపై వస్తున్న విమర్శల గురించి అఖిలేశ్ స్పందిస్తూ, కుటుంబ రాజకీయాలతో కూడా ఒక్కోసారి లాభమేనని నవ్వుతూ వ్యాఖ్యానించారు. రాబోయే ఎన్నికల్లో ఈ అజెండాతోనే ప్రభుత్వాన్ని ఏర్పాటు చేయడమే తమ లక్ష్యమని ఆయన స్పష్టం చేశారు.
