నీట్ పరీక్షా పత్రం లీకేజీని నిరసిస్తూ ఢిల్లీలో ఆందోళన చేస్తున్న విద్యార్థులపై కేంద్ర ప్రభుత్వం వ్యవహరించిన తీరు సిగ్గుచేటని తెలంగాణ రక్షణ సేన చీఫ్ కల్వకుంట్ల కవిత బుధవారం ఒక వీడియో సందేశంలో పేర్కొన్నారు. పరీక్షలు పారదర్శకంగా నిర్వహించాలని కోరిన విద్యార్థులపై ఇంటర్నెట్ నిలిపివేసి, సీసీ కెమెరాలు ఆపేసి లాఠీలతో దాడి చేయడం దారుణమని ఆమె ఆవేదన వ్యక్తం చేశారు. నాటి బ్రిటిష్ పాలకులు చేసిన దాష్టీకాలనే నేడు బీజేపీ ప్రభుత్వం సొంత ప్రజలపై ప్రయోగిస్తోందని, అందుకే బీజేపీ అంటే 'బ్రిటిష్ జాహిల్ పార్టీ' అని ఆమె విమర్శించారు.
ఈ పరీక్షా పత్రం లీకేజీ వల్ల 25 లక్షల మంది విద్యార్థులు నష్టపోయారని, ఇప్పటికే 21 మంది విద్యార్థులు ఆత్మహత్య చేసుకున్నారని కవిత వెల్లడించారు. విద్యార్థులపై జరిగిన దాడికి కేంద్ర ప్రభుత్వం వెంటనే క్షమాపణ చెప్పాలని, ఆత్మహత్య చేసుకున్న విద్యార్థుల కుటుంబాలను ఆదుకోవాలని ఆమె డిమాండ్ చేశారు. ఈ ఘటనలకు బాధ్యత ఎవరిదని, విద్యార్థుల మరణాలకు ఎవరు సమాధానం చెబుతారని ఆమె ప్రశ్నించారు.
మరోవైపు, స్విగ్గీ, జొమాటో, ఓలా, ఉబర్, ర్యాపిడో వంటి సంస్థల్లో పనిచేస్తున్న గిగ్ వర్కర్లు, డ్రైవర్ల కష్టాలను కూడా ఆమె ప్రస్తావించారు. రోజంతా శ్రమించినా వారి ఆదాయం కుటుంబ పోషణకు సరిపోవడం లేదని, అగ్రిగేటర్ సంస్థలు వారికి తగిన వేతనాలు ఇవ్వకుండా అన్యాయం చేస్తున్నాయని ఆమె ఆరోపించారు. ఈ విషయంలో ప్రభుత్వం జోక్యం చేసుకుని, ఛార్జీలు పెంచేలా చర్యలు తీసుకోవాలని కోరారు. గిగ్ వర్కర్లకు, డ్రైవర్లకు తెలంగాణ రక్షణ సేన అండగా ఉంటుందని ఆమె స్పష్టం చేశారు.
