భద్రాచలం డీఎస్పీ అరుణ్ కుమార్ గురువారం భద్రాచలం ట్రాఫిక్ పోలీస్ స్టేషన్ను సందర్శించి వార్షిక తనిఖీలు చేపట్టారు. ఈ సందర్భంగా ఆయనకు స్టేషన్ సిబ్బంది గౌరవ వందనం సమర్పించారు.
స్టేషన్ రికార్డులను, ప్రభుత్వ కిట్ ఆర్టికల్స్ను డీఎస్పీ క్షుణ్ణంగా పరిశీలించారు. పోలీస్ స్టేషన్ ఆవరణను పరిశుభ్రంగా ఉంచాలని సిబ్బందికి సూచించిన ఆయన, ఆ ప్రాంగణంలో మొక్కలు నాటారు.
పట్టణంలోని ప్రధాన కూడళ్లు, బస్టాండ్, దేవాలయాల పరిసరాల్లో ట్రాఫిక్ సమస్యలు తలెత్తకుండా నిరంతరం పర్యవేక్షించాలని డీఎస్పీ ఆదేశించారు. మద్యం తాగి వాహనాలు నడిపే వారిపై ప్రత్యేక నిఘా ఉంచి, డ్రంక్ అండ్ డ్రైవ్ తనిఖీలను కఠినంగా అమలు చేయాలని సూచించారు.
అతివేగం, ట్రిపుల్ రైడింగ్, హెల్మెట్ లేకపోవడం, సీట్ బెల్ట్ ధరించకపోవడం, ఫోన్ మాట్లాడుతూ వాహనం నడపడం వంటి ఉల్లంఘనలపై దృష్టి సారించాలని ఆయన ఆదేశించారు. రోడ్డు ప్రమాదాలను నివారించేందుకు ప్రమాదకర ప్రాంతాలను గుర్తించి, వాహనదారులకు ట్రాఫిక్ నిబంధనలపై అవగాహన కల్పించాలని కోరారు.
కేసుల వివరాలను సీసీటీఎన్ఎస్ 2.0 (పోలీస్ స్టేషన్లలో నమోదయ్యే కేసుల వివరాలను ఆన్లైన్లో నమోదు చేసే సాఫ్ట్వేర్)లో ఎప్పటికప్పుడు అప్డేట్ చేయాలని డీఎస్పీ స్పష్టం చేశారు. బ్లూకోల్ట్స్ వాహనాలతో పెట్రోలింగ్ నిర్వహిస్తూ ట్రాఫిక్ అంతరాయాలను వెంటనే తొలగించాలని ఆదేశించారు.
చివరగా, స్టేషన్ సిబ్బంది ఎదుర్కొంటున్న సమస్యలను డీఎస్పీ అడిగి తెలుసుకున్నారు. వీటి పరిష్కారానికి కృషి చేస్తానని హామీ ఇచ్చారు. ఈ కార్యక్రమంలో ట్రాఫిక్ ఎస్ హెచ్ ఓ తిరుపతి, ఇతర సిబ్బంది పాల్గొన్నారు.
