నవంబర్ 19 నుంచి 29 వరకు ఖతార్‌లోని దోహా వేదికగా జరగనున్న ఆసియా కప్ రైజింగ్ స్టార్స్ టోర్నమెంట్ కోసం భారత క్రికెట్ నియంత్రణ మండలి (BCCI) 15 మంది ఆటగాళ్లతో కూడిన ఇండియా ఏ జట్టును ఎంపిక చేసింది. ఈ జట్టుకు కెప్టెన్‌గా తెలుగు యువ బ్యాటర్ తిలక్ వర్మను నియమించగా, రాయల్ ఛాలెంజర్స్ బెంగళూరు జట్టులో కీలక ఆటగాడైన రజత్ పటీదార్ వైస్ కెప్టెన్‌గా వ్యవహరించనున్నారు. ఈ జట్టులో 15 ఏళ్ల యువ వైభవ్ సూర్యవంశీకి చోటు దక్కింది.
ఇటీవల న్యూజిలాండ్‌తో జరిగిన టీ20 సిరీస్‌లో రెండు మ్యాచ్‌లు ఆడి తన ప్రతిభను చాటుకున్న వైభవ్‌తో పాటు, విధ్వంసకర బ్యాటింగ్‌కు పేరుగాంచిన అభిషేక్ శర్మ కూడా జట్టులో ఉన్నారు. వీరుద్దరూ ప్రత్యర్థి జట్లకు గట్టి పోటీనివ్వనున్నారు. జట్టులో స్టార్ ఫినిషర్ రింకూ సింగ్ కూడా స్థానం సంపాదించారు.
వికెట్ కీపర్ బాధ్యతలను ప్రభ్‌సిమ్రన్ సింగ్, కుమార్ కుశాగ్ర పంచుకోనున్నారు. గాయం కారణంగా ఇంగ్లాండ్ పర్యటనకు దూరమైన పేసర్ హర్షిత్ రాణా ఈ టోర్నీ ద్వారా తిరిగి మైదానంలోకి అడుగుపెడుతుండగా, ప్రిన్స్ యాదవ్, అర్షద్ ఖాన్ బౌలింగ్ విభాగాన్ని బలోపేతం చేయనున్నారు. ఆల్‌రౌండర్ల విభాగంలో షాబాజ్ అహ్మద్, విప్రాజ్ నిగమ్, హర్ష్ దూబే, తనుష్ కొటియన్ జట్టుకు అదనపు బలాన్ని ఇస్తున్నారు.
2025 నాటి జట్టుతో పోలిస్తే ఈసారి సెలక్టర్లు పూర్తిగా యువ ఆటగాళ్లకు ప్రాధాన్యతనిస్తూ జట్టులో పలు మార్పులు చేశారు. ఈ టోర్నమెంట్‌లో మొత్తం ఎనిమిది జట్లు రెండు గ్రూపులుగా విడిపోయి పోటీ పడనున్నాయి. గ్రూప్-బిలో భారత్‌తో పాటు పాకిస్థాన్, నేపాల్, యూఏఈ జట్లు ఉన్నాయి.
గ్రూప్-ఏలో బంగ్లాదేశ్, శ్రీలంక, ఆఫ్ఘనిస్తాన్, హాంకాంగ్ జట్లు తలపడతాయి. ప్రతి గ్రూపు నుంచి మొదటి రెండు స్థానాల్లో నిలిచిన జట్లు సెమీఫైనల్‌కు చేరుకుంటాయి. నవంబర్ 29న ఈ టోర్నమెంట్ విజేతను నిర్ణయించే తుది పోరు జరగనుంది.
