ఆసుపత్రిలో చికిత్స పొందే సమయంలో నగదు రహిత (క్యాష్లెస్) సదుపాయం కోసం బీమా సంస్థలు వేగంగా స్పందించాలని IRDAI ఆదేశించింది. ఆసుపత్రి నుంచి అవసరమైన పత్రాలు అందిన గంటలోపు చికిత్సకు ప్రాథమిక ఆమోదం, డిశ్చార్జ్ సమయంలో మూడు గంటల్లోపు తుది అనుమతిని బీమా సంస్థలు తప్పనిసరిగా ఇవ్వాలి. దీనివల్ల రోగులు ఆసుపత్రి నుంచి బయటకు వచ్చేటప్పుడు ఆర్థిక ఇబ్బందులు ఎదుర్కోవాల్సిన అవసరం ఉండదు.
సాధారణ క్లెయిమ్ల పరిష్కారానికి కూడా గడువును నిర్ణయించారు. అన్ని పత్రాలు సమర్పించిన తర్వాత సాధారణ క్లెయిమ్లను 30 రోజుల్లోపు, ఇతర పాలసీలకు సంబంధించిన క్లెయిమ్లను 45 రోజుల్లోపు బీమా సంస్థలు పూర్తి చేయాలి.
ఎనిమిదేళ్ల పాటు వరుసగా పాలసీని రెన్యువల్ చేసుకున్న వారికి బీమా సంస్థలు అదనపు రక్షణ కల్పిస్తాయి. మోసం లేదా పాలసీ నిబంధనల్లో పేర్కొన్న మినహాయింపులు మినహా, ఇలాంటి వారి క్లెయిమ్లను తిరస్కరించే అధికారం బీమా సంస్థలకు ఉండదు.
పాలసీదారులు తమ వెయిటింగ్ పీరియడ్ క్రెడిట్లు, అంటే పాలసీ తీసుకున్న కొత్తలో కొన్ని రకాల చికిత్సలకు వర్తించని సమయాన్ని, అలాగే నో-క్లెయిమ్ బోనస్లను కోల్పోకుండా ఒక బీమా సంస్థ నుంచి మరో సంస్థకు సులభంగా మారవచ్చు.
ఒకవేళ క్లెయిమ్ తిరస్కరణకు గురైతే, అందుకు గల కారణాలను స్పష్టంగా చెప్పాలని బీమా సంస్థను అడిగే హక్కు పాలసీదారుకు ఉంది. ఒకవేళ బీమా సంస్థ నిర్ణయం అన్యాయమని భావిస్తే, పాలసీదారులు బీమా అంబుడ్స్మన్ను అంటే బీమా సంస్థలపై వచ్చే ఫిర్యాదులను పరిష్కరించే ప్రభుత్వ అధికారిని ఆశ్రయించవచ్చు.
