ఢిల్లీలో బుధవారం జరిగిన మీడియా సమావేశంలో రాహుల్ గాంధీ మాట్లాడుతూ, నీట్ పేపర్ లీకేజీ మరియు సీజేపీ ర్యాలీ సందర్భంగా విద్యార్థులపై జరిగిన దాడులను తీవ్రంగా ఖండించారు. ఢిల్లీ పోలీసు వ్యవస్థ, కేంద్ర బలగాలు నేరుగా కేంద్ర హోం మంత్రిత్వ శాఖ ఆధ్వర్యంలోనే పనిచేస్తాయని ఆయన గుర్తు చేశారు. నిరసన తెలిపిన విద్యార్థులపై పెల్లెట్ గన్స్, ఎలక్ట్రిక్ బ్యాటన్లు, మేకులున్న లాఠీలను ప్రయోగించడం దారుణమని ఆయన పేర్కొన్నారు.
ఈ దాడులకు అమిత్ షానే ఆదేశాలిచ్చారని, ఒకవేళ ఆయనకు ఈ విషయం తెలియకపోతే పదవిలో కొనసాగే అర్హత లేదని రాహుల్ వ్యాఖ్యానించారు. ఒకవేళ ఆయన ఆదేశాలతోనే దాడులు జరిగి ఉంటే, అమిత్ షానే ప్రధాన నిందితుడని ఆయన ఆరోపించారు. మైనర్లపై కూడా పోలీసులు దాడి చేశారని, విద్యార్థులపై అదనపు బలగాలను ఉపయోగించడం తీవ్రమైన చర్య అని రాహుల్ విమర్శించారు.
ఈ అంశంపై పార్లమెంట్లో మాట్లాడేందుకు తనకు అవకాశం ఇవ్వలేదని రాహుల్ ఆగ్రహం వ్యక్తం చేశారు. అమిత్ షాపై ఆరోపణలు చేసినందుకు క్షమాపణలు చెప్పాలని స్పీకర్ కోరుతున్నారని, అయితే తాను బీజేపీకి, ఆర్ఎస్ఎస్కు లేదా ఏ ఒక్క వ్యక్తికి క్షమాపణ చెప్పే ప్రసక్తే లేదని స్పష్టం చేశారు. విద్యార్థులపై జరిగిన దాడులకు బాధ్యుడైన అమిత్ షాను మంత్రివర్గం నుంచి తప్పించాలని ప్రధాని మోదీని ఆయన కోరారు.
