అమెరికాలో 'మిషన్ డిపోర్టేషన్' (దేశం నుంచి పంపించే ప్రక్రియ) వేగవంతమైంది. ఆగస్టు మొదటి 15 రోజుల్లోనే 5,200 మంది భారతీయులను అధికారులు వెనక్కి పంపారు. గత 16 ఏళ్లలో భారతీయుల బహిష్కరణలు ఈ స్థాయిలో జరగడం ఇదే మొదటిసారి.
అమెరికాలో అక్రమ వలసదారులను గుర్తించి, వారిని అరెస్ట్ చేసి దేశం నుంచి పంపే బాధ్యతను ఇమ్మిగ్రేషన్ అండ్ కస్టమ్స్ ఎన్ఫోర్స్మెంట్ (ICE) అనే సంస్థ చూస్తుంది. కేవలం జూన్ నెలలోనే 801 మంది భారతీయులకు ICE దేశం విడిచి వెళ్లాలని ఆదేశాలు జారీ చేసింది. ఈ జాబితాలో H-1B, O-1 వీసాలు కలిగిన నిపుణులు, అలాగే విద్యార్థులు కూడా ఉన్నారు.
సరైన వీసాపై అమెరికాకు వచ్చినప్పటికీ, చిన్నపాటి నిబంధనలు ఉల్లంఘించిన వారిని కూడా అధికారులు బహిష్కరిస్తున్నారు. ఉదాహరణకు, ట్రాఫిక్ సిగ్నల్ దాటిన విద్యార్థులను, సోషల్ మీడియాలో ట్రంప్ ప్రభుత్వంపై విమర్శలు చేసిన వారిని కూడా అధికారులు పంపేశారు. టెక్సాస్లో ఒక రెస్టారెంట్లో పార్ట్-టైమ్ పని చేస్తున్న H-1B వీసా హోల్డర్ను కూడా ICE అధికారులు అరెస్ట్ చేసి బహిష్కరించారు.
అమెరికా నుంచి వచ్చిన బహిష్కరణ ఆదేశాలపై కోర్టులో అప్పీల్ చేసుకునే అవకాశం ఉంది. లేదంటే, ఆ వ్యక్తి స్వచ్ఛందంగానే అమెరికా వదిలి వెళ్లవచ్చు. అయితే, ఈ నిబంధనలు చాలా మంది భారతీయులను ఆందోళనకు గురి చేస్తున్నాయి.
కెనడాలో పరిస్థితి కూడా ఇలాగే ఉంది. ఆల్బెర్టా ప్రావిన్స్లో పోస్ట్-గ్రాడ్యుయేషన్ వర్క్ పర్మిట్ (PGWP) — అంటే చదువు పూర్తయ్యాక కెనడాలో పని చేసుకునే అనుమతిని — ప్రభుత్వం రద్దు చేసింది. దీనివల్ల అక్కడ చదువుకుంటున్న సుమారు 1,500 మంది భారతీయ విద్యార్థులపై బహిష్కరణ ముప్పు పెరిగింది.
కెనడా ప్రధాని మార్క్ కార్నీ స్పందిస్తూ, సరైన వీసా లేదా వర్క్ పర్మిట్ లేని విద్యార్థులు తప్పనిసరిగా దేశం విడిచి వెళ్లాలని స్పష్టం చేశారు. ఆల్బెర్టా ప్రీమియర్ డేనియల్ స్మిత్ కూడా స్టడీ వీసా అనేది కేవలం తాత్కాలిక పత్రం మాత్రమేనని, దీనిపై కఠినంగా వ్యవహరిస్తామని ప్రకటించారు.
