ఏపీ రాజధాని అమరావతి రూపురేఖలను మార్చే దిశగా సీఎం చంద్రబాబు నాయుడు నేతృత్వంలోని ప్రభుత్వం కృష్ణానదిపై ప్రతిష్ఠాత్మకమైన సిగ్నేచర్ బ్రిడ్జ్ నిర్మాణానికి శ్రీకారం చుట్టింది. ప్రకాశం బ్యారేజీకి 300 మీటర్ల దిగువన, రైలు వంతెనకు సమీపంలో 1.10 కిలోమీటర్ల పొడవుతో ఈ ఆరు వరుసల వంతెనను నిర్మించనున్నారు. అమరావతి గ్రోత్ ఇన్ఫ్రాస్ట్రక్చర్ కార్పొరేషన్ (AGICL) ఆధ్వర్యంలో ఈ ప్రాజెక్టు పనులు ప్రారంభమయ్యాయి.
ఈ వంతెన కేవలం వాహనాల రాకపోకలకే కాకుండా, పర్యాటక ఆకర్షణగా నిలిచేలా ఐకానిక్ గేట్వేగా తీర్చిదిద్దాలని ప్రభుత్వం భావిస్తోంది. అంతర్జాతీయ ప్రమాణాలతో నిర్మించనున్న ఈ బ్రిడ్జిపై పాదచారులకు, సైక్లిస్టులకు ప్రత్యేకంగా ఫుట్పాత్లు, సైకిల్ ట్రాక్లను ఏర్పాటు చేయనున్నారు. ఈ ప్రాజెక్టు పూర్తయితే విజయవాడ నగరం, హైదరాబాద్-మచిలీపట్నం జాతీయ రహదారి (NH-65) తో అమరావతికి మెరుగైన అనుసంధానం లభిస్తుంది. ప్రస్తుతం ప్రకాశం బ్యారేజీపై ఉన్న ట్రాఫిక్ రద్దీని తగ్గించడానికి కూడా ఇది దోహదపడుతుంది.
ఈ ప్రాజెక్టును ఇంజినీరింగ్, ప్రొక్యూర్మెంట్, కన్స్ట్రక్షన్ (EPC) పద్ధతిలో చేపట్టేందుకు ప్రభుత్వం చర్యలు తీసుకుంటోంది. ప్రస్తుతం నాలుగు రకాల డిజైన్ నమూనాలను ప్రజల అభిప్రాయాల కోసం అందుబాటులో ఉంచారు. వీటిలో ఒకదాన్ని ఎంపిక చేసిన తర్వాత, సంబంధిత కన్సల్టెన్సీ సంస్థ మూడు నెలల్లోగా డీపీఆర్ (DPR) సమర్పించాల్సి ఉంటుంది.
ప్రాజెక్టు నిర్మాణానికి అవసరమైన నిధుల కోసం ప్రపంచ బ్యాంకు, ఆసియా అభివృద్ధి బ్యాంకు (ADB) వంటి అంతర్జాతీయ సంస్థల సహకారాన్ని ప్రభుత్వం పరిశీలిస్తోంది. ప్రాజెక్టు అధ్యయనం కోసం బిడ్లు దాఖలు చేయడానికి ఈ నెల 26 వరకు గడువు ఇచ్చారు. ఎంపికైన సంస్థ సమర్పించే అంచనా వ్యయం, డిజైన్ వివరాల ఆధారంగా తదుపరి నిర్ణయాలు తీసుకుంటారు.
