లండన్లో అధిక వేతనంతో కూడిన ఉద్యోగాన్ని వదిలి భారత్కు తిరిగి వచ్చిన దివ్య మిట్టల్, 2012లో యూపీఎస్సీ పరీక్షలో 68వ ర్యాంకు సాధించి ఐఏఎస్ అధికారిగా బాధ్యతలు చేపట్టారు. 13 ఏళ్ల సర్వీసులో మీర్జాపూర్ జిల్లా కలెక్టర్గా పనిచేసిన సమయంలో, 75 ఏళ్లుగా నీటి సౌకర్యం లేని లహరియా దాహ్ గ్రామానికి జల్ జీవన్ మిషన్ ద్వారా పైప్లైన్ కనెక్షన్లు కల్పించారు. 125 ఇళ్లకు, సుమారు 1,200 మందికి నీటిని అందించిన ఆమె కృషిని స్థానికులు ఇప్పటికీ గుర్తు చేసుకుంటారు.
అయితే, డియోరియాలో డీఎమ్గా పనిచేస్తున్న సమయంలో స్థానిక బీజేపీ ఎమ్మెల్యేతో విభేదాలు తలెత్తాయి. ప్రోటోకాల్ పాటించలేదనే ఆరోపణలతో ఎమ్మెల్యే ముఖ్యమంత్రికి ఫిర్యాదు చేయడంతో, ఆమెను బదిలీ చేసి వెయిటింగ్ లిస్టులో ఉంచారు. ఆ తర్వాత గ్రామంలో కొత్తగా వేసిన పైప్లైన్ను గుర్తు తెలియని వ్యక్తులు ధ్వంసం చేయడంతో నీటి సరఫరా మళ్లీ నిలిచిపోయింది. గత నాలుగు నెలలుగా ఎటువంటి కీలక బాధ్యతలు అప్పగించకపోవడంతో ఆమె సర్వీసు నుంచి తప్పుకున్నారు.
దివ్య మిట్టల్ భర్త, 2011 బ్యాచ్ ఐటీఎస్ అధికారి గగన్దీప్ సింగ్ ధిల్లాన్ కూడా 2022లో తన పదవికి రాజీనామా చేశారు. ప్రస్తుతం గగన్దీప్ సొంతంగా వ్యాపార సంస్థను నడుపుతున్నారు. దివ్య మిట్టల్ భర్త వ్యాపారంలో భాగస్వామి కావడం లేదా రాబోయే అసెంబ్లీ ఎన్నికల్లో మీర్జాపూర్ నుంచి పోటీ చేయడం వంటి నిర్ణయాలు తీసుకునే అవకాశం ఉందని రాజకీయ వర్గాల్లో ఊహాగానాలు వినిపిస్తున్నాయి.
తన రాజీనామాకు ముందు ఆమె సోషల్ మీడియాలో పోస్ట్ చేసిన స్ఫూర్తిదాయక వీడియో ఒకటి ప్రస్తుతం విస్తృతంగా వ్యాపిస్తోంది. 'అలసిపోతే నిద్రపోండి, కానీ ఆగిపోకండి' అంటూ ఆమె చేసిన వ్యాఖ్యలు చర్చకు దారితీశాయి. అధికారిక పోస్టింగ్ లేకుండా నిరీక్షణ జాబితాలో ఉన్న సమయంలోనే ఆమె ఈ నిర్ణయం తీసుకోవడం గమనార్హం.
